Самарқандда ювишга қолдирилган Gentra’ни олиб қочган «мойка» ходими ушланди. У 10 йилгача озодликдан маҳрум қилиниши мумкин

Самарқандда Gentra олиб қочган 25 ёшли шахсга жиноят иши қўзғатилди. Бу ҳақда ИИВ Тергов департаменти хабар берди.

Маълум бўлишича, 30 октябрь куни соат 17:30 да 21 ёшли Д.Э. Самарқанд шаҳар Кимёгарлар қўрғони Сайқал кўчасида жойлашган автомашиналарни ювиш шохобчасига келиб, ўзининг Gentra’сини ювдириш учун автомашина ювувчи бўлиб ишлайдиган 25 ёшли Ш.А.га қолдирган. Бундан фойдаланган Ш.А. ўт олдириш жойида турган калит ёрдамида автомашинани ўт олдириб, уни номаълум томонга олиб қочган.

Олиб борилган тезкор қидирув тадбирлари натижасида Самарқанд шаҳар ИИО ФМБ ходимлари томонидан Ш.А. мазкур транспорт воситасини бошқариб кетаётган вақтида мажбурий тартибда тўхтатилган. Шунга қарамасдан Ш.А. ИИО ФМБ ходимларига фаол қаршилик кўрсатиб, ўзи олиб қочган автомашина эшикларини очмасдан ундан тушишдан бош тортганлиги сабабли ходимлари томонидан эшикни очиш ва Ш.А.ни ушлаш мақсадида охирги зарурият сифатида машина эшиги ойнаси синдирилган.

Мазкур ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан Ш.А.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.

Жиноят иши бўйича Ш.А. айбланувчи тариқасида ишда иштирок этишга жалб қилинган ва унга нисбатан қамоққа олиш тарзидаги эҳтиёт чораси қўлланилган. Ҳозирда тергов ҳаракатлари олиб борилмоқда.

​​Маълумот учун, транспорт воситасини олиб қочиш жиноий жавобгарликка сабаб бўлади. Шу турдаги жиноят содир этган шахсга нисбатан 10 йилгача муддатда озодликдан маҳрум қилиш жазоси тайинланиши мумкин.

Аввалроқ Тошкент шаҳар ИИББ ҳайдовчилардан машина калитларини «мойка» ходимларига топширмасликни сўрагани ҳақида хабар берилган эди.