Бутунукраина жамоатчилик фикрини ўрганиш чоғида берилган бешта саволнинг барчаси бўйича ижобий жавоблар олинди, деб хабар бермоқда Meduza.
Олий Радада депутатлар сонини 450 дан 300 кишигача қисқартириш таклифи энг кўп қўллаб-қувватланди: сўралганларнинг 95 фоизи буни ёқлаб овоз берган бўлса, 4 фоизи қарши бўлди.
Ўта йирик миқдордаги коррупция учун умрбод қамоқ жазосини жорий қилишни 81 фоиз одам ёқлаган бўлса, 16 фоизи бу таклифга қарши чиқди.
Украинанинг Будапешт меморандуми билан белгилаб қўйилган хавфсизлик кафолатларидан фойдаланиш ҳуқуқини сўралганларнинг 78 фоизи қўллаб-қувватлади, яна 10 фоизи норози бўлди.
Мамлакатда оғир беморларда оғриқни камайтириш учун тиббий каннабисни қонунийлаштириш таклифини сўров иштирокчиларининг 70 фоизи қўллади, яна 24 фоизи қарши чиқди.
Донецк ва Луганск вилоятлари ҳудудида эркин иқтисодий зона яратиш ғоясини эса иштирокчиларнинг 45 фоизи ёқлаб овоз берди, 43 фоизи ёқламади.
Украина президенти Владимир Зеленский ташаббуси билан ташкил қилинган Бутунукраина ижтимоий сўрови 25 октябрь куни мамлакатдаги маҳаллий сайловлар чоғида бўлиб ўтди. Интервью олувчилар сайлов участкаларидан чиққан украиналикларни сўровдан ўтказди. Якуний натижалар 26 октябрь куни эълон қилиниши кутилмоқда.
Сўров натижалари бевосита ҳуқуқий кучга эга бўлмайди. Зеленский «бешта муҳим савол» бўйича умумий сўров ўтказилишига тўғридан-тўғри демократия шаклларидан бири деб қарашини айтганди.
Изоҳ (0)