АҚШнинг Минскдаги элчихонаси собиқ президентликка номзод Светлана Тихановская томонидан Беларусь ҳокимиятига қўйилган ультиматум фонида республикадаги АҚШ фуқароларига оммавий ҳаракатларда қатнашмасликни, шунингдек, камида уч кунлик озиқ-овқат, сув ва дори-дармон захирасини яратишни тавсия қилди. Бу ҳақда элчихонага таяниб, «Интерфакс» хабар қилди.
Дипломатик ваколатхона веб-сайтидаги хабарда айтилишича, мухолифат Беларусь расмийларини 25 октябргача маълум талабларни бажаришга чақирган. Агар ҳукумат талабларга кўнмаса норозилик намойишлари, иш ташлаш, транспорт ҳаракатини чеклаш ва бошқа чоралар қўлланилишини ваъда қилган. Дипломатлар ушбу вазиятда ҳуқуқни муҳофаза қилиш идоралари ва намойишчилар оммавий норозиликлар пайтида куч ишлатишни кучайтириши мумкинлигини истисно этмайди.
Шу муносабат билан элчихона АҚШ фуқароларига самолёт ёки қуруқлик транспорти орқали мамлакатни тарк этиш имкониятларини ўрганишни маслаҳат беради. Намойиш ўтадиган манзиллардан узоқроқда бўлиш ва маҳаллий янгиликларни кузатиб бориш тавсия этилади.
Бундан ташқари, дипломатик ваколатхона фуқаролар ҳар доим ёнида шахсий гувоҳнома, шу жумладан, амалдаги Беларусь визаси ёки амалдаги визасиз кириш штампи бўлган АҚШ паспорти билан юришни тавсия қилади.
Эслатиб ўтамиз, Беларусда 9 август куни бўлиб ўтган сайловларни сохталаштириш ҳақидаги маълумотлар фонида норозилик намойишлари бошланди ва ҳалигача давом этмоқда. Намойишчилар Лукашенкони сайлов натижаларини сохталаштиришда айбламоқда. Сайлов натижаларига кўра, Александр Лукашенко 80 фоиз овоз тўплаган.
Беларусь Марказий сайлов комиссияси маълумотларига кўра, Светлана Тихановская президентлик сайловида 10,1 фоиз овоз тўплаган. Тихановскаянинг ўзи эса мағлубиятини тан олмади ва ўзини «Беларусь халқи томонидан сайланган ягона етакчи» деб атади. Сайловдан икки кун ўтгач Тихановская Литвага чиқиб кетган. Унинг сафдошлари Тихановская ҳукумат босими остида мамлакатдан чиқиб кетганини маълум қилган.
Собиқ президентликка номзод Светлана Тихановскаянинг тарафдорлари 18 август куни янги сайловлар ўтказиш орқали мамлакатда ҳокимиятни транзит қилиш мақсадида Мувофиқлаштирувчи кенгаш тузди. Беларусь бош прокурори Александр Конюкнинг таъкидлашича, Мувофиқлаштирувчи кенгаш фаолияти конституцияга қарши ва ҳокимиятни қўлга олишга қаратилган.
Кенгашнинг ташкил этилиши муносабати билан Жиноят кодексининг 361-моддаси билан жиноят иши қўзғатилиб, унинг доирасида Мувофиқлаштирувчи кенгашнинг бир нечта вакиллари ҳибсга олинган.
Беларусь президенти Александр Лукашенко 10 октябрь куни Давлат хавфсизлик қўмитаси тергов ҳибсхонасида Мувофиқлаштирувчи кенгаш ва мухолифатнинг қўшма штабининг ҳибсга олинган вакиллари билан учрашди. Кейинчалик Беларусь ҳукумати Светлана ва Сергей Тихановскийга 134 кун ичида биринчи марта суҳбатлашишига рухсат этди, 13 октябрда Тихановскаянинг Беларусь ҳукуматига «халқ ультиматум»ини эълон қилгани ҳақида хабар берилди. Мухолифат етакчиси амалдаги президентга ўйлаб кўриш учун 25 октябргача муҳлат берган. Агар Лукашенко ўз лавозимини тарк этмаса, 26 октябрь куни мамлакатда халқ қўзғолони кўтарилади ва ҳукуматга қарши ҳаракатлар бошланади.
Изоҳ (0)