Ukrainada mahalliy kengashlarga saylovlar kuni uchastkalarda beshta muhim masala yuzasidan jamoatchilik fikrini o‘rganishga qaratilgan mamlakat miqyosidagi so‘rovnoma o‘tkaziladi. Ukraina prezidenti Vladimir Zelenskiy ushbu muhokama o‘tkazilishini tasdiqlagan va 16-oktabr kuni avval oshkor qilinmagan uch asosiy masala qaysi ekaniga to‘xtalgan. Bu haqda Unian agentligi xabar tarqatdi.

Foto: Reuters

Ukraina fuqarolari javob berishi kerak bo‘lgan savollar tibbiyot kannabisi yetishtirish va sotishni qonuniylashtirish, parlament tarkibi va yadro qurolidan voz kechishga qaratilgan Budapesht shartnomasi talablarini bajarish masalalarini qamrab olgan.

  • Oliy Rada deputatlari sonini 300 nafargacha qisqartirish kerakmi?
  • Siz Ukrainada og‘ir ahvoldagi bemorlarni davolash maqsadida tibbiyot kannabisini yetishtirish va sotishni qonuniylashtirishni qo‘llab-quvvatlaysizmi?
  • Ukraina Budapesht kelishuvi bilan belgilab qo‘yilgan xavfsizlik kafolatlaridan xalqaro darajada foydalanishi kerakmi?

Avvalroq Zelenskiy dastlabki ikki savol haqida gapirgan, ular korrupsiya jinoyati uchun umrbod qamoq jazosini qo‘llash hamda Donbassda erkin iqtisodiy zonani tashkil etish masalalarini qamrab olgan.

Zelenskiy besh muhim masala bo‘yicha aholi fikrini o‘rganishga yo‘naltirilgan mamlakat miqyosidagi so‘rovnomani o‘tkazish xususida 13-oktabrda gapirgan va buni to‘g‘ridan to‘g‘ri demokratiya shakllaridan biri sifatida tan olishini aytgandi.

“Mustaqillik tarixi davomida ilk bora “Siz nima deb o‘ylaysiz?” degan savolni fuqarolarga beryapmiz. Nima uchun? Sizning javobingiz biz uchun muhim. Sababi Ukraina bu — sizlar, hammasi siz bergan javoblarga qarab amalga oshiriladi”, — degan Zelenskiy.

Ukrainada mahalliy kengashlarga saylovlar va Zelenskiy tashabbusi bilan qilinayotgan xalq so‘rovnomasi 25-oktabrda o‘tkaziladi. So‘rovnoma javoblari to‘g‘ridan to‘g‘ri yuridik kuchga ega emas.