Тоғли Қорабоғда гуманитар мақсадларда ўт очишни тўхтатиш бўйича енги режим 26 октябрь куни маҳаллий вақт билан 8:00 да (Тошкент вақти билан 9:00 да) кучга кирди, деб ёзади Meduza. Низо ҳудудида навбатдаги сулҳ ҳақида Арманистон, Озарбайжон ва АҚШнинг қўшма баёнотида эълон қилинган эди.
«АҚШ Арманистон ва Озарбайжонни Тоғли Қорабоғдаги низони тинч йўл билан тартибга солишга яқинлаштириш учун Минск гуруҳи ҳамраислари ва ташқи ишлар вазирлари ўртасида интенсив музокаралар ўтказилишига имконият яратди», — дейилади АҚШ Давлат департаменти баёнотида.
Сулҳ кучга кириши билан дарҳол иккала томон ҳам бир-бирини ўт очишни тўхтатиш режимини бузишда айблади.
Озарбайжон Мудофаа вазирлиги Арманистон ҳарбийлари Қорабоғдаги Тертер шаҳрини ва яқин орадаги қишлоқларни ўққа тутганини маълум қилди.
Сўнг Арманистон Мудофаа вазирлигида Озарбайжон қуролли кучлари Қорабоғ армиясининг минтақанинг шимоли-шарқий йўналишидаги позицияларига артиллериядан ўт очганини хабар қилишди.
Эслатиб ўтамиз, Тоғли Қорабоғдаги ҳарбий ҳаракатлар тинчликка эришиш учун қилинган иккита уринишга қарамасдан, 27 сентябрдан буён давом этмоқда. Озарбайжон ва Арманистон 10 октябрь куни соат 12:00 дан бошлаб Тоғли Қорабоғда ўт очишни тўхтатиш тўғрисида келишиб олганди. Аммо шу куни кейинроқ Арманистон ва Озарбайжон Мудофаа вазирликлари бир-бирини Тоғли Қорабоғда ўт очишни тўхтатиш режимини бузишда айблади.
19 октябрда Арманистон бош вазири Никол Пашинян ва Озарбайжон президенти Илҳом Алиев Тоғли Қорабоғдаги можаро бўйича музокаралар ўтказишга тайёрлигини маълум қилган. Кейинроқ Пашинян Тоғли Қорабоғда Россия учун бевосита хавф солувчи Сурия террорчилик гуруҳлари жангарилари бўлганлиги учун Москва у ерда аксилтеррорчилик операцияларини ўтказиш учун асосга эга эканлигини айтган.
Туркия эса Боку илтимос қилса, «иккиланмасдан» Озарбайжонга аскарларини жўнатиши ва ҳарбий кўмак беришини маълум қилди.
Изоҳ (0)