«Тошшаҳартрансхизмат» тизимидаги корхоналар ҳаракат таркиби 300 дона катта сиғимли шаҳар электробуслари билан янгиланади. Бу ҳақда Вазирлар Маҳкамасининг 2021—2023 йилларда «Тошшаҳартрансхизмат» АЖ тизимидаги корхоналар ҳаракат таркибини янгилаш дастури тўғрисидаги қарори лойиҳасида маълум қилинди.

Фото: «Тошшаҳартрансхизмат» АЖ матбуот хизмати

Қарор билан 2021—2023 йиллар мобайнида «Тошшаҳартрансхизмат» АЖ тизимидаги корхоналар ҳаракат таркибини 300 дона катта сиғимли шаҳар электробуслари ва қувватлаш ускуналари билан янгилаш дастури тасдиқланади.

Транспорт вазирлиги, Инвестициялар ва ташқи савдо вазирлиги, Тошкент шаҳар ҳокимлиги ва «Тошшаҳартрансхизмат»нинг 2021—2023 йиллар давомида ҳар йили 100 донадан, жами 300 дона катта сиғимли шаҳар электробуслари ва қувватлаш ускуналарини харид қилиш тўғрисидаги таклифи қабул қилиниши мумкин.

300 дона катта сиғимли шаҳар электробуслари ва қувватлаш ускуналарини харид қилишни молиялаштириш манбайи этиб «Ўзсаноатқурилишбанк»нинг 7 йиллик муддатга, бир йиллик имтиёзли шартлар билан Марказий банкнинг қайта молиялаштириш ставкаси миқдорида, «Ўзсаноатқурилишбанк»нинг 0,5 фоиздан ортиқ бўлмаган маржаси қўшилган ҳолда ажратиладиган кредит маблағлари ҳисобланади.

Кредит маблағларини қоплаш, фоизлар, комиссиялар ва жалб қилинаётган кредитларга хизмат кўрсатиш билан боғлиқ бошқа харажатларни тўлаш республика бюджети маблағлари ҳисобидан амалга оширилади.

Молия вазирлигига «Ўзсаноатқурилишбанк» томонидан 300 дона катта сиғимли электробуслар ва қувватлаш ускуналари хариди учун кредит маблағлари ажратилишида маблағлар тақчиллиги юзага келганда, Молия вазирлиги Ғазначилигининг вақтинчалик бўш маблағларини ўрнатилган тартибда «Ўзсаноатқурилишбанк»га  жойлаштирилиши ҳуқуқи берилади.

«2019—2020 йилларда Беларусь ва Хитойда ишлаб чиқарилган катта сиғимли электробуслар «Тошшаҳартрансхизмат» АЖ тасарруфидаги шаҳар йўналишларида тест синовларидан муваффақиятли ўтказилганлиги ҳамда электробусларнинг йўловчилар учун қулайлиги, шовқинсизлиги, атмосферага зарарли моддалар чиқармаслиги ва тасарруф сарф-харажатларининг камлиги маълумот учун қабул қилинсин», — дейилади қарор лойиҳасида.

Эслатиб ўтамиз, Тошкент ҳокими Жаҳонгир Ортиқхўжаев ва «Белкоммунмаш» раҳбари Владимир Корол ўртасида 2018 йил сентябрида бўлиб ўтган музокаралар якунига кўра, Беларусь электробусларидан бирини Тошкентда синаб кўриш бўйича келишувга эришилган эди. 450 минг долларга харид қилинган биринчи электробус Тошкентда 13 сентябрдан ҳаракатланишни бошлаганди. Тошкент шаҳар ҳокимлиги бундай электробуслар сони 10 та етказилишини маълум қилган. Шу йилнинг март ойидан бошлаб эса Тошкентнинг 52-автобус йўналиши (Бешёғоч—Юнусобод) бўйлаб Хитойнинг Yutong электробуси синов тариқасида қатнай бошлаганди.