«Дарё» мухбирининг хабар беришича, самарқандлик фуқаро Б.А. 2019 йилнинг октябрь ойида Самарқанд шаҳрининг Даҳбед кўчасида яшовчи фуқаро Хуршида Гадоеванинг ишончига кириб, унинг Самарқанд давлат университетига тўлаши лозим бўлган 126 миллион 976 минг сўм тўлов-контрактини ўзи ахлоқ тузатиш ишлари жазосини ўтаётган «Шаҳзода Улуғбек сервис» МЧЖнинг ҳисоб рақамидан тўлаб беришини айтиб, Хуршида Гадоевадан бўлиб-бўлиб 2200 доллар пул олган.
Б.А. фуқародан Самарқанд давлат университетининг тўлов-шартнома бланкасини олиб, ушбу бланкага ва тўлов топшириқномасига гўёки унинг ўқиши учун тўлов-шартномаси бўйича университет ҳисоб рақамига 126 миллион 976 минг сўм пул маблағлари кўчирилганлиги тўғрисида «Шаҳзода Улуғбек сервис» МЧЖнинг муҳри ва МЧЖ директори М.Дониёровнинг имзосини сохталаштириб, сохта шартнома ва тўлов топшириқномасини тақдим этган.
Жиноят ишлари бўйича Самарқанд шаҳар суди судьяси Фарруҳ Саматовнинг маълум қилишича, Б.А. хавфли рецидивист бўлиб, бундан аввал ҳам бир неча бор фирибгарлик, ўзганинг мулкини алдаш ёки ишончини суиистеъмол қилиш жиноятларини содир этган.
Мазкур жиноят иши юзасидан республика суд экспертиза маркази Самарқанд вилояти бўлимининг 2020 йил 18 мартдаги хулосасига кўра, Б.А. тақдим этган тўлов контракт шартномаси сохталаштирилганлиги маълум бўлган.
Жиноят ишлари бўйича Самарқанд шаҳар судида судланувчи Б.А.нинг жиноят иши кўриб чиқилиб, у Жиноят кодексининг 168-моддаси 3-қисми «б» банди (такроран ёки хавфли рецидивист томонидан фирибгарлик) ва 228-моддаси 1-қисми (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан айбли деб топилиб, 5 йил муддатга озодликдан маҳрум қилинган.
Шунингдек, унга базавий ҳисоблаш миқдорининг 20 фоизини давлат даромади ҳисобига ушлаб қолган ҳолда 3 йил муддатга ахлоқ тузатиш ишлари жазоси ҳам қўлланилган.
Изоҳ (0)