Инвестициялар ва ташқи савдо вазирининг биринчи ўринбосари Азиз Воитов вазирлик томонидан карантин пайтида меҳмонхона харажатлари учун сарфланган 1 миллиард сўмга яқин маблағ тўғрисидаги хабарларга изоҳ берди. Вазирликнинг «Дарё»га маълум қилишича, ходимларни меҳмонхонада жойлаштириш учун сарфланган маблағлар бюджет ҳисобидан олинмаган.
Эслатиб ўтамиз, Давлат харидлари бўйича очиқланган маълумотга кўра, Инвестиция ва ташқи савдо вазирлигининг 84 нафар ходими Тошкент шаҳрида жойлашган Inter Hotel меҳмонхонасида 22 сутка яшаб, уч маҳал овқатлангани ҳамда меҳмонхона анжуманлар залидан фойдалангани учун 918 миллион 677 минг 500 сўм тўлов амалга оширилган. Мазкур ҳолат ОАВ ҳамда ижтимоий тармоқларда кенг муҳокамага сабаб бўлди.
Бугун ОАВ тарқатаётган маълумотларга изоҳ берар эканман, эътиборни нашрда етишмаётган баъзи тафсилотларга қаратмоқчиман.Маълумот учун, Инвестициялар ва ташқи савдо вазирлиги 2019 йилнинг январида Ўзбекистон Президентининг тегишли фармони билан Ташқи савдо вазирлиги ва Инвестициялар бўйича давлат қўмитаси негизида ташкил этилган.Ходимларни меҳмонхонага жойлаштириш тўғрисида қарор биринчи локдаун киритилиши билан боғлиқ бўлган вақт босими шароитида қабул қилинган. Эпидемиологик вазиятнинг ноқулай ривожланиши натижасида вазирлик олдида карантин чекловларининг қийин шароитида экспорт қилувчи корхоналар ва инвестиция лойиҳаларини амалга оширувчи тадбиркорларни қўллаб-қувватлаш бўйича самарали иш учун минимал миқдордаги кадрларни кафолатлаш вазифаси турган эди. Ўрта менежмент ҳар бир бўлимнинг бир ёки иккита асосий мутахассиси билан биргаликда масофадан туриб ишлаш учун меҳмонхонада изоляция қилиниш сценарийси танланди. Ҳаммаси бўлиб вазирликнинг марказий аппарати ходимларидан 84 нафари танлаб олинди. Кўпинча, ходимлар уйдан масофадан ишлашга ўтказилди ва Инвестициялар ва ташқи савдо вазирлиги раҳбарияти барча хавфсизлик талабларига риоя қилган ҳолда одатдагидек ишлашда давом этди.
Меҳмонхонани турар жой учун белгилашнинг мантиқийлиги аниқ ва шаффофдир: Inter Hotel — бизга қарашли меҳмонхона бўлиб, уни Inter Forum ДУК бошқаради. Вазиятни бошқариш ва маблағни тежаш нуқтаи назаридан, бу шубҳасиз энг яхши вариант, бинобарин маблағ Инвестициялар ва ташқи савдо вазирлиги тизими ичида айланган. Бундан ташқари, ушбу харажатларни қоплаш учун бюджет маблағларидан бир сўм ҳам ишлатилмаган.
Бундан ташқари, Inter Hotel юқори нарх категориясига тегишли меҳмонхоналардан бири эканлигига қарамасдан, биз шахсларни карантинда жойлаштириш учун меҳмонхоналарга тавсия этилган маблағдан четга чиқмадик. Бу бўйсунувчи ташкилот танловининг яна бир ижобий томони, аммо меҳмонхонанинг ўзи учун бизнинг ташаббусимиз «мажбурий» юкка айланмади: аксинча – локдаун шароитида биз меҳмонхоналар ходимларининг қисман бандлигини таъминладик.
Шуни таъкидлашни истардимки, ушбу стратегия ўзининг самарадорлигини исботлади — 84 нафар ходимнинг ҳеч бири коронавирус билан касалланмаган. Бу вазирликнинг узлуксиз ишлашини ва натижада иқтисодий самараси юз миллионлаб эмас, балки триллионлаб сўмни ташкил этадиган лойиҳаларни амалга оширишни таъминлади.
Бироқ келажакда ташқи сўровлар учун очиқ ташкилот сифатида биз оммавий ахборот воситаларидан конструктив ёндашувни кутиб қоламиз. Бизнинг фикримизча, вазирликнинг кейинги тушунтиришлари билан эмас, балки олдиндан олинган маълумотлари билан ушбу турдаги нашрлар бир ёқлама бўлмас эди. Умид қиламизки, охир-оқибат биз оммавий ахборот воситалари билан ўзаро муносабатларнинг айнан шу форматига келамиз.
Азиз Воитов, инвестициялар ва ташқи савдо вазирининг биринчи ўринбосари
Изоҳ (0)