Калифорнияда Tesla Model 3 эгаси бўлган шифокор Али Вазири ўзи билмаган ҳолда автомобили учун бир неча минг долларлик апгрейд буюртма қилиб юборди. У буюртмани телефони устига ўтириб олиб, тасодифан амалга оширган, деб хабар беради Hi-Tech.Mail.ru.
Вазири сентябрь охирида Tesla иловаси орқали 4200 долларлик апгрейд буюртма қилган. Шифокорнинг тахминича, бу шимининг ҳамёнидаги смартфонга ўтириб олганида содир бўлган.
«Телефоним жинсимда эди. Мен уни чиқариб, машинада қувватлантиришга қўйдим. Бир неча дақиқадан сўнг SMS келди. Бунга қадар Tesla иловаси орқали ҳеч нарса харид қилмаганман», — дейди Вазири.
Инсон ўз шимининг ҳамёнидаги смартфон орқали SMS юбориши, телефон қилиши ёки шунга ўхшаш бошқа ҳолатларни амалга ошириши butt-dial ёки pocket dial («ҳамён орқали қонғироқ») номини олган. Pocket dial ибораси 2015 йилда Оксфорд луғатига ҳам киритилган.
Эркак тўрт минг доллардан ортиқ пулни ҳайдовчига ёрдам берувчи функциялар учун тўлаб юборган. Унинг ичида йўналишни автоматик алмаштириш ва автоматик равишда тураргоҳга жойлашиш каби хизматлар бор.
Вазири зудлик билан Tesla’га қўнғироқ қилиб, уларнинг маслаҳатига кўра илова орқали буюртмаларни ортга қайтариш тугмасини босмоқчи бўлган, бироқ иловада бу каби тугма бўлмаган. Шундан сўнг унга буюртмани қайтариш бўйича e-Mail’ига хабар келган, аммо унда ҳам пулнинг қайтарилиши бўйича бирор тугма ёки ҳавола бўлмаган.
Шундан буён компаниянинг техник хизмат кўрсатиш бўлими Вазирига ўз пулларини қайтариб олиш бўйича бирор жўяли маълумот бера олмаган. Эндиликда у пулларни ўз банки орқали қайтариб олиш ниятида.
Эслатиб ўтамиз, июнь ўрталарида германиялик эркак тасодифан 27 та Tesla Model 3 электромобилига буюртма бериб юборган эди.
Изоҳ (0)