COVID-19’га қарши дори Трампнинг руҳиятига таъсир қилиши мумкин
АҚШ президенти Дональд Трамп коронавирусга қарши қабул қилаётган дорилар унинг руҳий соғлиғига ва қарорларининг муносиблигига, хусусан ядро қуролини қўллаш тўғрисидаги қарорига таъсир ўтказиши мумкин. Бу ҳақда The New York Times газетасига таяниб, «Korrespondent.net» хабар бермоқда.
Экспертлар фикрига кўра, касалликни юқтирганидан кейин Оқ уй раҳбарининг олдиндан айтиб бўлмайдиган хатти-ҳаракатларга ва гапларга мойиллиги анча ошган.
Мақолада Америка етакчисини даволашда қўлланилаётган дексаметазон дориси ҳақида айтилган. Ушбу стероид одамда эйфория ҳиссини, тўсатдан бўладиган ғайрат ошишларини, енгилмаслик ҳиссиётини чақириши мумкин — ушбу ҳолатлар симптомларини нашр Трампнинг ҳарбий госпиталда даволанаётган чоғидаги хатти-ҳаракатларида кузатган.
«Муаммо шундаки, дексаметазон одамни параноикка ёки савдойига айлантириб қўя олади. Унга бу доридан қандай миқдорда берилганини биз билмаймиз. Агар у ярим тунда фармойиш берса ва уни ҳеч ким тўхтатмаса, ҳаммаси унинг ҳарбий ёрдамчисининг фармонни ўз манзилига етказмасликка шайлиги ва ҳарбий қўмондонлик марказидаги маълум бир навбатчининг фармонни бажариш учун қабул қилмасликка шайлигига боғлиқ бўлади», — деди Массачусец технология институте профессори Випин Наранг.
Олимни Вашингтондаги Америка олимлари федерацияси ядро қуроллари ҳақида хабардорлик лойиҳаси директори Ханс Кристенсен қўллаб-қувватлади.
«Ядро тугмасига дорини қабул қилаётган президентнинг бармоғи тегмаслиги керак», — дея қўшимча қилди у.
Эслатиб ўтамиз, Дональд Трамп ва унинг рафиқаси Меланияда 2 октябрь куни коронавирусга топширган тест жавоби ижобий чиққан. Сўнг у Уолтер Рид номидаги миллий ҳарбий тиббиёт марказида даволанган.
Америка президентини даволовчи шифокор Шон Конлининг маълум қилишича, Трампнинг организмида кислород даражаси 93 фоизгача тушиб кетганидан сўнг дексаметазон қўлланилган. Шифокорлар стероидни 3 октябрь куни ремдесивир препаратининг иккинчи дозаси билан бирга қўллашни бошлаган, Трампда иккиламчи таъсирлар аниқланмаган.
