Хитойда нима учун коронавируснинг иккинчи тўлқини йўқлигига изоҳ берилди

«Вечерная Москва» Хитойда яшовчи россияликлардан мамлакат коронавируснинг иккинчи тўлқини бошланмаслигини таъминлаш учун қандай тизим асосида ишлар ташкил қилингани ва фуқаролар қандай эҳтиёт чораларини қўллагани ҳақида маълумотлар олди.

«Хитойда ҳаёт аллақачон аввалги меъёрий ритмга қайтган. Гонконгда вақти-вақти билан касалланиш ҳолатлари кузатилади, лекин шов-шувли хабарлар тез фурсатларда жимиб қолади. Хитойликларда бу борада ўзига хос тизим ишлаб чиқилган, ресурслар ҳаммага етади», — деган Гуанчжоуда яшовчи Александр исмли киши.

Унинг сўзларига кўра ҳукумат фуқаролардан ҳотиржамликка берилмаслик ва хавфсизлик талабларига риоя қилишни сўрайди. Бундан ташқари, касалликнинг локал тарзда тарқалишига мамлакат раҳбарияти томонидан тезкор тарзда муносабат билдирилади.

«Масалан, июнда Пекинда касаллик тарқалиши кескин ошди, лекин инфекция ўчоғи тезкорлик билан кучсизлантирилди. Ушбу ишларга икки ҳафта сарф этилди. Бунда пойтахт шаҳарни ёпишга ҳам тўғри келгани йўқ», — дея қўшимча қилган у.

Шанхайда яшовчи Андрей Хитойда айрим чеклов чоралари ҳанузгача сақлаб қолинганини билдирган. Унинг айтишича, мамлакатда хориждан келганларнинг ҳаммаси 14 кунлик мажбурий карантинни ўтайди. Шунингдек, бир қатор ташкилотларда ходимлар ва ташриф буюрувчиларнинг тана ҳарорати ўлчанади, гоҳида шахсга доир ҳужжатларни кўрсатиш ҳам талаб этилади.

«Ҳар бир маҳаллий аҳоли вакилида смартфонида махсус дастур ишлаб туради. Илова соғлиқ кодини ҳисоб-китоб қилади. Дастур телефон эгасининг ҳудуд бўйлаб ҳаракатланишини кузатади. Агар мобил қурилма эгаси касалланиш кўрсаткичи юқори бўлмаган ҳудудларга бормаган бўса, унга яшил код берилади, акс ҳолда эса — қизил рангли белги билан юришга мажбур», — дейди Андрей.

Карантинга риоя қилиш Хитойда қатъий назорат қилинади. Масалан, қоидабузар қўлига махсус тасма тақилиши ва хонадони эшиги олдига камера ўрнатилиши мумкин.

Охирги бир сутка давомида 11 октябрь ҳолатига кўра Хитойда COVID-19’га чалиниш бўйича 26 та янги ҳолат кузатилган. Мамлакатда 2020 йил бошидан бери 91 минг нафар одам коронавирус инфекциясига чалинган.