AQSh prezidenti Donald Tramp koronavirusga qarshi qabul qilayotgan dorilar uning ruhiy sog‘lig‘iga va qarorlarining munosibligiga, xususan yadro qurolini qo‘llash to‘g‘risidagi qaroriga ta’sir o‘tkazishi mumkin. Bu haqda The New York Times gazetasiga tayanib, “Korrespondent.net” xabar bermoqda.
Ekspertlar fikriga ko‘ra, kasallikni yuqtirganidan keyin Oq uy rahbarining oldindan aytib bo‘lmaydigan xatti-harakatlarga va gaplarga moyilligi ancha oshgan.
Maqolada Amerika yetakchisini davolashda qo‘llanilayotgan deksametazon dorisi haqida aytilgan. Ushbu steroid odamda eyforiya hissini, to‘satdan bo‘ladigan g‘ayrat oshishlarini, yengilmaslik hissiyotini chaqirishi mumkin — ushbu holatlar simptomlarini nashr Trampning harbiy gospitalda davolanayotgan chog‘idagi xatti-harakatlarida kuzatgan.
“Muammo shundaki, deksametazon odamni paranoikka yoki savdoyiga aylantirib qo‘ya oladi. Unga bu doridan qanday miqdorda berilganini biz bilmaymiz. Agar u yarim tunda farmoyish bersa va uni hech kim to‘xtatmasa, hammasi uning harbiy yordamchisining farmonni o‘z manziliga yetkazmaslikka shayligi va harbiy qo‘mondonlik markazidagi ma’lum bir navbatchining farmonni bajarish uchun qabul qilmaslikka shayligiga bog‘liq bo‘ladi”, — dedi Massachusets texnologiya institute professori Vipin Narang.
Olimni Vashingtondagi Amerika olimlari federatsiyasi yadro qurollari haqida xabardorlik loyihasi direktori Xans Kristensen qo‘llab-quvvatladi.
“Yadro tugmasiga dorini qabul qilayotgan prezidentning barmog‘i tegmasligi kerak”, — deya qo‘shimcha qildi u.
Eslatib o‘tamiz, Donald Tramp va uning rafiqasi Melaniyada 2-oktabr kuni koronavirusga topshirgan test javobi ijobiy chiqqan. So‘ng u Uolter Rid nomidagi milliy harbiy tibbiyot markazida davolangan.
Amerika prezidentini davolovchi shifokor Shon Konlining ma’lum qilishicha, Trampning organizmida kislorod darajasi 93 foizgacha tushib ketganidan so‘ng deksametazon qo‘llanilgan. Shifokorlar steroidni 3-oktabr kuni remdesivir preparatining ikkinchi dozasi bilan birga qo‘llashni boshlagan, Trampda ikkilamchi ta’sirlar aniqlanmagan.
Izoh (0)