Ҳиндистонда 11 октябрь ҳолатига кўра бир сутка ичида коронавирусга чалиниш бўйича 74,3 мингта янги ҳолат қайд этилди ва мамлакатда COVID-19 коронавирус инфекциясини юқтириб олганлар сони 7,05 миллионга етди. Бу ҳақда Ҳиндистон соғлиқни сақлаш вазирлиги ахборотига таяниб «РИА Новости» хабар берди.
Ҳиндистон бутун дунёда коронавирусга чалинганлар сони бўйича АҚШдан кейин иккинчи ўринда бормоқда. АҚШда 7,7 миллион нафар одамда COVID-19 инфекцияси борлиги аниқланган.
Ҳиндистон ССВнинг қайд этишича, бир сутка ичида 1 миллионта тест ўтказилган ва 89 минг нафар кишининг касалликни енггани аниқланган. Коронавирусдан соғайганларнинг умумий сони 6 миллион нафардан ошган.
Мамлакатда Ҳиндистон тиббий тадқиқотлар кенгаши томонидан ўтказилган бошқа бир серологик тадқиқот натижаларига кўра вируснинг тарқалиш ҳажми яна ҳам кенгроқ бўлиши мумкин. Тадқиқот бўйича аҳолисининг сони 1,3 миллиарддан ошган Ҳиндистонда 18 ёш ва ундан катта ҳиндистонликларнинг 7,1 фоизи коронавирусга чалинган. Тадқиқот 17 августдан 22 сентябргача бўлган оралиқда ўтказилиб, унда 29 минг нафар киши иштирок этган.
Аввал дунёда коронавирусга чалинишлар сони бўйича кунлик антирекорд кетма-кет учинчи кун янгилангани, жаҳонда COVID-19’га чалинганлар сони 37 миллиондан ошгани ҳақида хабарлар берилган. 8 октябрда коронавирус инфекциясини юқтириб олганлар сони бутун дунёда 36 миллион нафардан ошган.
Эслатиб ўтамиз, Жаҳон соғлиқни сақлаш ташкилоти 2020 йил 11 март куни ер юзида COVID-19 коронавирус инфекциясининг тарқалиши пандемия даражасига чиққанини эълон қилган.
Изоҳ (0)