Ўзбекистонда «олтин дафтар» юритилиб, унга хориждаги муваффақиятли ватандошлар киритилиши хабар берилган эди. «Дунё» ахборот агентлигининг маълум қилишича, Ўзбекистоннинг Сеулдаги элчихонаси «Олтин дафтари»га киритилган ватандошлар сафи 100 кишидан ошди.
Қайд этилишича, Ўзбекистоннинг Жанубий Кореядаги элчихонаси вакиллари давлат раҳбарининг Ўзбекистонни ривожлантиришда чет элда меҳнат қилаётган ватандошларимиз имкониятларидан фойдаланиш бўйича ташаббусини ҳаётга татбиқ этиш доирасида Кодже шаҳрига амалий сафар қилди.
Кодже шаҳрида жойлашган Samsung ва Daewoo компанияларининг кемасозлик заводларида 500 га яқин ўзбекистонлик мутахассис ишлайди. Шаҳар касб-ҳунар коллежида эса 40 га яқин ўзбекистонлик таҳсил олмоқда.
Мулоқотлар доирасида Ўзбекистонда бизнес лойиҳаларни амалга ошириш, бу билан янги иш ўринлари яратишга кўмаклашиш ниятида бўлган бир гуруҳ ватандошлар билан учрашув бўлиб ўтган. Тадбирда Ўзбекистон Президенти томонидан 17 август куни ўтказилган йиғилиш, унда чет элда ишлаётган юртдошларимиз учун муносиб шароитлар яратиш ва улар билан тизимли ишлаш, шунингдек, мамлакатимизда тадбиркорлик фаолиятини бошлашни режалаштирганлар учун имтиёз ва преференсиялар тақдим этиш масалалари кўриб чиқилгани ҳақида батафсил маълумот берилган.
Учрашувда саккиз киши Ўзбекистонда ўз лойиҳаларини амалга ошириш учун 600 минг доллар миқдорида сармоя киритиш бўйича таклиф билдирган. Шундай қилиб, Ўзбекистоннинг Сеулдаги элчихонаси «Олтин дафтари»га киритилган ватандошлар сафи 100 кишидан ошди. Улар томонидан жалб қилинадиган инвестицияларнинг умумий ҳажми қарийб 14 миллион долларни ташкил этмоқда.
Изоҳ (0)