O‘zbekistonda “oltin daftar” yuritilib, unga xorijdagi muvaffaqiyatli vatandoshlar kiritilishi xabar berilgan edi. “Dunyo” axborot agentligining ma’lum qilishicha, O‘zbekistonning Seuldagi elchixonasi “Oltin daftari”ga kiritilgan vatandoshlar safi 100 kishidan oshdi.
Qayd etilishicha, O‘zbekistonning Janubiy Koreyadagi elchixonasi vakillari davlat rahbarining O‘zbekistonni rivojlantirishda chet elda mehnat qilayotgan vatandoshlarimiz imkoniyatlaridan foydalanish bo‘yicha tashabbusini hayotga tatbiq etish doirasida Kodje shahriga amaliy safar qildi.
Kodje shahrida joylashgan Samsung va Daewoo kompaniyalarining kemasozlik zavodlarida 500 ga yaqin o‘zbekistonlik mutaxassis ishlaydi. Shahar kasb-hunar kollejida esa 40 ga yaqin o‘zbekistonlik tahsil olmoqda.
Muloqotlar doirasida O‘zbekistonda biznes loyihalarni amalga oshirish, bu bilan yangi ish o‘rinlari yaratishga ko‘maklashish niyatida bo‘lgan bir guruh vatandoshlar bilan uchrashuv bo‘lib o‘tgan. Tadbirda O‘zbekiston Prezidenti tomonidan 17-avgust kuni o‘tkazilgan yig‘ilish, unda chet elda ishlayotgan yurtdoshlarimiz uchun munosib sharoitlar yaratish va ular bilan tizimli ishlash, shuningdek, mamlakatimizda tadbirkorlik faoliyatini boshlashni rejalashtirganlar uchun imtiyoz va preferensiyalar taqdim etish masalalari ko‘rib chiqilgani haqida batafsil ma’lumot berilgan.
Uchrashuvda sakkiz kishi O‘zbekistonda o‘z loyihalarini amalga oshirish uchun 600 ming dollar miqdorida sarmoya kiritish bo‘yicha taklif bildirgan. Shunday qilib, O‘zbekistonning Seuldagi elchixonasi “Oltin daftari”ga kiritilgan vatandoshlar safi 100 kishidan oshdi. Ular tomonidan jalb qilinadigan investitsiyalarning umumiy hajmi qariyb 14 million dollarni tashkil etmoqda.
Izoh (0)