Ўзбекистон Соғлиқни сақлаш вазирлиги Тошкент вилояти юқумли касалликлари шифохонаси бош шифокори, вилоят бош инфекционисти Гулжаҳон Йўлдошева иши бўйича ўз муносабатини билдирди. Вазирлик прокуратура идораларидан Гулжаҳон Йўлдошевага қўлланилган қамоққа олиш чорасини бошқа эҳтиёт чораси билан алмаштиришни сўради.
Ҳозирда Тошкент вилояти юқумли касалликлар шифохонаси бош шифокори, вилоят бош инфекционисти Гулжаҳон Йўлдошеванинг қамоққа олиниши масаласи интернет тармоғида кенг муҳокамаларга сабаб бўлмоқда.Қайд этиш жоизки, Гулжаҳон Йўлдошеванинг ҳибсга олингани ҳақида 8 сентябрь куни хабар тарқалди. Бош прокуратура бу ҳолатга 10 сентябрь куни муносабат билдириб, Гулжаҳон Йўлдошева Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш) ҳамда 207-моддаси 3-қисми «а» банди (одам ўлимига сабаб бўладиган мансабга совуққонлик билан қараш) билан айбланувчи тариқасида ишда иштирок этишга жалб этилгани ва эҳтиёт чораси сифатида қамоққа олинганини маълум қилди.Ўзбекистон Республикаси Жиноят процессуал кодексининг 36-моддасига кўра, терговчи терговнинг йўналиши ва тергов ҳаракатларини юритишга оид барча қарорларни прокурор рухсатини олиш қонунда назарда тутилган ҳолларни истисно этганда мустақил равишда қабул қилади.
Мазкур кодекснинг 14-моддасига кўра, одил судловни амалга оширишда судьялар мустақил фаолият юритиб, фақат қонунга бўйсунадилар.
Судьялар ва халқ маслаҳатчиларининг одил судловни амалга ошириш борасидаги фаолиятига бирор-бир тарзда аралашишга йўл қўйилмайди ва бундай аралашув қонунга мувофиқ жавобгарликка сабаб бўлади.
Ўзбекистон Республикаси Соғлиқни сақлаш вазирлиги юқоридаги идоралар фаолиятига аралашишга ҳақли бўлмаса-да, Гулжаҳон Йўлдошева аёл киши эканлиги ҳамда қарамоғида 6 нафар вояга етмаган фарзанди борлигини инобатга олган ҳолда, прокуратура идораларидан бошқа эҳтиёт чорасини танлаш масаласини кўриб чиқишни сўрайди.
Ўзбекистон Соғлиқни сақлаш вазирлиги
Шундан кейин Гулжаҳон Йўлдошеванинг олти нафар фарзанди борлиги, уларнинг энг кичиги икки ёшда эканлигига қарамасдан, унга нисбатан қамоққа олиш эҳтиёт чораси қўлланилгани юзасидан турли фикрлар билдирилди.
Хусусан, Олий Мажлис Сенати раиси Танзила Норбоева 2 октябрь куни Гулжаҳон Йўлдошевага қўлланилган эҳтиёт чорасига муносабат билдириб, «Оғир жиноят қилганлар ҳам четга чиқиб кетмаслик шарти билан уйда сақланади — боласининг олдида, оиласида бўлади. Шу нуқтаи назардан, унинг жинояти қанчалик оғир ёки оғир эмаслигига ҳозир баҳо бера олмайман, лекин аёл киши, кичкина боласи борлигини эътиборга олиб, ҳозирча қамоққа олмаслик ҳам мумкин эди, қачонки суд қарор чиқармагунича», деб айтганди.
Маҳалла ва оилани қўллаб-қувватлаш вазирлиги Гулжаҳон Йўлдошева билан 3 октябрь куни Омбудсман ҳузуридаги миллий превентив механизм (МПМ) доирасида суҳбат ташкил этилгани, вазирлик Гулжаҳон Йўлдошеванинг қамоққа олинганидан ташвишдалигини билдирди.
Президент Шавкат Мирзиёевнинг тўнғич қизи — Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, гендер тенгликни таъминлаш масалалари бўйича комиссия аъзоси Саида Мирзиёева 5 октябрь куни вилоят бош инфекционисти билан боғлиқ ишни кузатиб бораётганини маълум қилди ҳамда прокуратурадан Гулжаҳон Йўлдошевага нисбатан қамоққа олиш эҳтиёт чорасини ўзгартиришни сўраб чиқди.
Бош прокуратура 6 октябрь куни Гулжаҳон Йўлдошевага қўлланилган ҳибсга олиш тўғрисидаги эҳтиёт чорасини уй қамоғига ўзгартириш масаласи Чирчиқ прокуратураси томонидан кўриб чиқилаётганини маълум қилди.
Соғлиқни сақлаш вазирлиги эса Бош прокуратура мазкур иш бўйича қамоққа олиш эҳтиёт чораси уй қамоғига ўзгартирилиши кутилаётганини маълум қилиб бўлганидан кейин прокуратура идораларидан Гулжаҳон Йўлдошевага нисбатан бошқа эҳтиёт чорасини танлаш масаласини кўриб чиқишни сўрамоқда. Соғлиқни сақлаш вазирлиги шифокор қўлга олинганига қарийб бир ой ўтганидан кейин биринчи марта мазкур иш бўйича расмий муносабат билдирди.
Изоҳ (0)