Саида Мирзиёеванинг мурожаатидан сўнг Гулжаҳон Йўлдошева уй қамоғига ўтказилиши кутилмоқда

Тошкент вилояти бош инфекционисти Гулжаҳон Йўлдошевага қўлланилган ҳибсга олиш тўғрисидаги эҳтиёт чораси уй қамоғига ўзгартирилиши кутилмоқда. Бош прокуратура матбуот хизматининг «Дарё»га маълум қилишича, ҳозирда Чирчиқ прокуратураси томонидан бу масала кўриб чиқилмоқда.

Фото: «Kun.uz»

Тошкент вилояти юқумли касалликлар шифохонаси бош шифокори, вилоят бош инфекционисти Гулжаҳон Йўлдошева коронавирус касаллигига чалинган бемор ўлимига сабабчи бўлиш ва 250 миллион сўм маблағни талон-торож қилишда айбланиб, ҳибсга олинганди. Жиноят кодексининг 116-моддаси 3-қисми (эҳтиётсизлик орқасидан одам ўлишига сабаб бўлган касб юзасидан ўз вазифаларини лозим даражада бажармаслик) билан жиноят иши қўзғатилган.

Прокуратура баёнотига кўра, айбланувчи Гулжаҳон Йўлдошева тергов ҳаракатларини амалга оширишга тўсқинлик қилаётгани, ўзига юклатилган мажбуриятларни бажармаётгани, у томонидан содир этилган жиноят оғир жиноятлар туркумига кириши, шунингдек, унинг жиноий фаолият билан шуғулланишига барҳам бериш, қочиб кетишининг, далилларни яшириши ёки йўқ қилиб юборишининг олдини олиш мақсадида процессуал тартибда ушланиб, суднинг 9 сентябрдаги ажрими билан унга нисбатан қамоққа олиш эҳтиёт чораси қўлланилган.

6 октябрь куни Президент Шавкат Мирзиёевнинг тўнғич қизи — Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, гендер тенгликни таъминлаш масалалари бўйича комиссия аъзоси Саида Мирзиёева прокуратурадан Гулжаҳон Йўлдошевага нисбатан қамоққа олиш эҳтиёт чорасини ўзгартиришни сўраб чиққан эди.

Ундан аввал Олий Мажлис Сенати раиси Танзила Норбоева Тошкент вилояти бош инфекционистига қўлланилган эҳтиёт чорасига муносабат билдириб, «Оғир жиноят қилганлар ҳам четга чиқиб кетмаслик шарти билан уйда сақланади — боласининг олдида, оиласида бўлади. Шу нуқтаи назардан, унинг жинояти қанчалик оғир ёки оғир эмаслигига ҳозир баҳо бера олмайман, лекин аёл киши, кичкина боласи борлигини эътиборга олиб, ҳозирча қамоққа олмаслик ҳам мумкин эди, қачонки суд қарор чиқармагунича», деб айтганди.

Шунингдек, Маҳалла ва оилани қўллаб-қувватлаш вазирлиги Гулжаҳон Йўлдошеванинг қамоққа олинганидан ташвишдалигини билдирган.