Janubiy Koreyaning O‘zbekistondagi elchixonasi 24-sentabrdan boshlab koronavirusga PZR-testi ma’lumotini tasdiqlash uchun konsullik tekshiruvi tizimini joriy qildi va laboratoriyalar ro‘yxatiga o‘zgartirish kiritmoqda. Bu haqda elchixona matbuot xizmatiga tayanib “Gazeta.uz” xabar berdi.

Foto: Yonhap

Qayd etilishicha, O‘zbekistondan Janubiy Koreyaga borishni rejalashtirayotgan fuqarolar (shu jumladan tranzit yo‘lovchilar) uchib kelgandan so‘ng elchixonada tomonidan tasdiqlangan klinikadan PZR usulda olingan COVID-19’ga qarshi test natijasi salbiy chiqqanini ko‘rsatuvchi ma’lumotnomani ko‘rsatishlari kerak (test uchib ketishdan 48 soat avval olingan bo‘lishi lozim).

Ayni paytda Toshkentdan charter reyslarda faqat Janubiy Koreya fuqarolari va ularning oila a’zolarigina uchishga ruxsat etilganligiga qaramasdan amaldagi vizaga ega bo‘lgan ko‘plab O‘zbekiston fuqarolari uchinchi mamlakatlar orqali Janubiy Koreyaga kirib kelmoqda.

Elchixona ma’lumotlariga ko‘ra, O‘zbekistondan jo‘nab ketayotgan va Janubiy Koreyaga uchinchi davlatlar orqali kirib kelayotgan o‘zbekistonliklarda PZR-test natijasi manfiy chiqqanini ko‘rsatuvchi ma’lumotnoma borligiga qaramay, boshqa mamlakatlarga qaraganda COVID-19’ga qarshi test natijalari ijobiy chiqishi hollari ko‘proq uchramoqda.

Janubiy Koreya OAVlarining xabar berishicha, O‘zbekistondan kirib kelgan, ma’lumotnomaga ega 421 nafar chet elliklarning 52 nafari (12,4 foizi)da COVID-19 tasdiqlangan.

“Bu ayrim shaxslar PZR-test natijasi salbiy chiqqan ma’lumotnomani soxtalashtirayotgani yoki salbiy natijali ma’lumotnoma olish uchun testning ataylab noto‘g‘ri o‘tkazilayotgani, yoki uchinchi mamlakat tranzit zonasida virus yuqtirib olayotganidan dalolat beradi. Shu sababli Jabubiy Koreyaga uchib kelinganda COVID-19’ga qarshi test ijobiy chiqqan juda ko‘p hollar aniqlanmoqda”, — deyiladi elchixona xabarida.

Elchixona PZR-testi natijasi qalbakilashtirilganda yoki Janubiy Koreyaga kirish uchun boshqa noto‘g‘ri yo‘llar orqali manfiy natija haqidagi ma’lumotnoma noqonuniy yo‘l bilan olinganda, qoidabuzar jinoiy javobgarlikka (1 yilgacha qamoq yoki 10 million von — 8500 dollargacha jarimaga) tortilishi yoki deport qilinishi (shu jumladan, mamlakatga kirishga taqiq qo‘yilishi)ni  hisobga olishni so‘ragan.

Qayd etilishicha, O‘zbekistondan kelgan shaxslar orasida COVID-19’ga chalinganlar soni muntazam ortadigan bo‘lsa, qat’iy karantin choralarini joriy etishdan tortib mamlakatga O‘zbekistondan kelganlarni kiritmaslik masalasigacha ko‘rib chiqilishi mumkin.

24-sentabr kuni Swiss Lab elchixona tomonidan tasdiqlangan tibbiy muassasalar ro‘yxatidan chiqarilgan. Ayni paytda Toshkentning Mirobod tumani, Qo‘yliq-5 mavzesida joylashgan Korea №1 Laboratory natijalari tan olinadi.

Xabar yozilgan vaqtda Janubiy Koreyada 23 661 kishi koronavirusga chalingani, ularning 21 292 nafari sog‘aygani, 406 nafari vafot etgani rasman tasdiqlangan.