Тошкент ҳайвонот боғига каркидон ва зебралар олиб келинади

Пойтахт ҳайвонот боғида катта ўзгаришлар бўлиши кутилмоқда. Бу ҳақда «Gazeta.uz»га Тошкент ҳайвонот боғи раҳбари Абдуҳофиз Рустамов маълум қилган.

Қайд этилишича, аттракционлар узоқроқ жойга кўчириб ўтказилади, ҳайвонлар ва ташриф буюрувчилар учун эса шароит яхшиланади. «Реконструкция лойиҳаси деярли тайёр бўлган ва ҳозирда тўлов ва инвестицияни муҳокама қилиш босқичида турибмиз», — деган Абдуҳофиз Рустамов.

Унинг айтишича, реконструкция учун ҳайвонот боғини бутунлай ёпиш режалаштирилмаган, ҳаммаси босқичма-босқич амалга оширилади. Ҳозирда мутахассислар Тошкентга зебра, каркидон ҳамда бир жуфт фил ва жирафани олиб келиш устида ишламоқда. «Одамлар нафақат чет элнинг, балки ўзимизнинг ҳам ҳайвонларимизни томоша қилишлари учун Сурхондарё ва Бухородан архарлар, мархурлар, сайғоқларни олиб келишни режалаштиряпмиз», — деб таъкидлаган ҳайвонот боғи раҳбари.

Шунингдек, айрим дарслар ҳайвонот боғида ўтилиши учун Халқ таълими вазирлиги билан музокаралар олиб борилаётганини билдирган. Бунинг учун мактаблар транспорт ва гид билан таъминланади, ўқувчилар эса ҳайвонларни дарсликлардан эмас, балки жонли равишда кўриб ўрганади.

«Телевизор ва монитор фақат суратини беради холос, ушлаб кўриш имконини бермайди. Чет эл ҳайвонот боғларида ёш меҳмонларга дўстона ҳайвонларга яқинлашиш ва уларни силаш учун рухсат берилиши бежиз эмас. Шундай қилиб, қўрқувдан халос бўлиш мумкин. Эҳтимол, Тошкентда ҳам шунга ўхшаш нарса пайдо бўлар. Болалар бераҳм бўлиб улғаймасликлари учун ҳайвонларга нисбатан меҳр уйғотиш керак», — дейди Абдуҳофиз Рустамов.