Россияда май ойидан бери илк бор бир суткада 10 мингдан ортиқ кишида COVID-19 аниқланди

Россияда 4 октябрда коронавирусга чалиниш бўйича 10 499 та ҳолат қайд этилди, деб хабар бермоқда Meduza коронавирус инфекциясига қарши кураш бўйича тезкор штабга таяниб. Бир кун аввал 9859 киши касаллангани хабар берилган эди. Мамлакатда COVID-19 тарқалишни бошлаганидан буён 1 215 001 киши касалланган.

Хабарда айтилишича, кунлик касалланиш сони 10 минг кишидан ортиқ бўлган ҳолат охирги марта 15 май куни қайд этилган.

Сўнгги суткада энг кўп бемор Москва шаҳрида қайд этилган — 3327 киши. Иккинчи ўринда Санкт-Петербург бўлиб, 392 кишида COVID-19 аниқланган.

Шунингдек, сутка давомида коронавирус тасдиқланган беморларнинг 107 нафари вафот этган. Умумий ҳисобда эса пандемия бошланганидан буён Россияда янги коронавирус инфекцияси билан касалланган 21 358 киши вафот этган.

Сўнгги суткада коронавирусдан тузалган 3284 киши касалхонадан чиқарилган. Умумий ҳисобда мамлакатда 979 143 киши COVID-19’дан соғайган.

«Роспотребнадзор» маълумотларига кўра, мамлакатда коронавирусни аниқлаш бўйича сўнгги суткада 436 мингта, умумий ҳисобда эса 47,6 миллионта лаборатория текширувлари ўтказилган.