Сурия ҳудудидаги жангарилар мамлакат ҳудудидан чиқиб кетмаса, Туркия уларга қарши янги ҳарбий операция бошлаши мумкин. Бу ҳақда Туркия президенти Ражаб Тоййиб Эрдўғон маълум қилган, деб хабар берди НТВ.
«Сурияда ҳали ҳам террорчилар эгалик қилаётган ҳудудлар мавжуд, у ерлар бизга ваъда қилинганидек, жангарилардан тозаланади ёки биз бориб, ўзимиз бу ишни амалга оширамиз» — деган у.
Эрдўғон Анқаранинг Суриянинг Идлиб вилоятида янги ижтимоий фожиа рўй бермаслиги учун ҳар қандай чоралар қўллашга тайёрлигини билдирган.
Сентябрь охирида Сурия ТИВ раҳбари Валид Муаллим Туркия ҳамда АҚШни мамлакат ҳудудида босқинчилик ҳаракатларини амалга оширганликда айблаган. Вазирнинг сўзларига кўра, Анқара Сурия ҳудудида «Жабхат ан-Нусра» террорчилик гуруҳига кўмак беришда давом этмоқда. Муаллим Дамашқнинг ўз ҳудудлари босиб олинишига қарши туришга тайёрлигини айтган.
Туркиянинг аввалги ҳарбий операцияси 2019 йил 9 октябрда бошланган ва «Тинчлик булоғи» номини олганди. Ушбу ҳарбий ҳаракатлар Анқара террорчи деб ҳисобловчи курд жангари гуруҳларига қарши қаратилган, мамлакат уларни Суриядан сиқиб чиқариб, ўз ҳудудидаги қочоқлар учун хавфсиз ҳудуд тузишни режалаштирганди. Кейинчалик 2019 йил 17 октябрда АҚШ ҳамда Туркия Анқаранинг ҳарбий операциясини беш кунга тўхтатишни келишиб олди. Ушбу оралиқда курд жангарилари гуруҳи уруш кетаётган ҳудудни тарк этиши лозим эди.
2019 йил 22 октябрда Сочида ўтган музокараларда Россия президенти Владимир Путин ҳамда Туркия давлат раҳбари Ражаб Тоййиб Эрдўғон Сурия шимоли-шарқини инқироздан олиб чиқиш борасида музокаралар олиб бориб, келишув имзолаган.
Мавзуга доир: Дунё сиёсий майдонидаги яна бир тўқнашув. Эрдўғон ва Асад ўртасидаги зиддиятнинг охири нима бўлади?
Россия мудофаа вазирлиги Сурия қўшинларининг Идлибда «Хайят Таҳрир аш-Шом» гуруҳининг жангариларига қарши уруш олиб бораётгани ва ушбу гуруҳга Анқара ҳомийлик қилишини билдирган.
Кейинчалик 1 июлда Россия, Туркия ҳамда Эрон давлат раҳбарлари араб давлатининг мустақиллиги ва ҳудудий яхлитлиги ҳақида қўшма баёнотни эълон қилди.
Изоҳ (0)