Коронавирус инфекциясига чалинган АҚШ президенти Дональд Трампнинг аҳволи 2 октябрь куни эрталаб ташвиш уйғотган. «РБК»нинг Fox News’га таяниб хабар беришича, бу ҳақда Оқ уй администрацияси раҳбари Марк Медоуз маълум қилган.
Унинг айтишича, давлат раҳбарига COVID-19 ташхиси қўйилганидан сўнг унинг аҳволи кескин ёмонлашган. «Унинг ҳарорати кўтарилиб, қондаги кислород миқдори кескин тушиб кетди. Биз жуда хавотирга тушгандик», — деган Медоуз.
Аввалроқ 3 октябрь куни Америка ОАВлари ушбу вазиятдан хабардор манбаларга таяниб, Трампнинг ҳаётий кўрсаткичлари вирус юқтиргандан сўнг дастлабки бир суткада «жуда хавотирли» бўлганини ёзган.
Медоузнинг қўшимча қилишича, айни пайтда президентнинг аҳволи анча яхшиланган, сатурация даражаси нормал ҳолатга келган, иссиғи эса тушган. Бундан аввал Трампнинг саломатлик кўрсаткичлари яхшилангани ҳақида унинг даволовчи шифокори Шон Конли маълум қилган. Шифокорнинг сўзларига кўра, Трампда қоннинг кислород билан тўйинганлик даражаси 96-98 фоизни ташкил қилмоқда. Конлининг таъкидлашича, давлат раҳбари шанба кунининг биринчи ярмида ишлаган ва ҳаракатланиш билан боғлиқ муаммоларга дуч келмаган.
Трампнинг ўзи касалхонадан видеомурожаат ёзиб, соғлиғи яхшилангани ва яқинда сайлов пойгасига қайтишини кутаётганини эълон қилган.
Эслатиб ўтамиз, Дональд Трамп ва унинг рафиқаси Меланияда 2 октябрь куни коронавирусга топширган тест жавоби ижобий чиққан. Бундан аввал Трампнинг маслаҳатчиси Ҳоуп Хиксда COVID-19 аниқланган, шу сабабли президент оиласи билан биргаликда Оқ уйда изоляция қилинганди. Трампнинг касаллиги тасдиқлангандан сўнг у Уолтер Рид номидаги ҳарбий-тиббиёт марказига ётқизилган.
Касаллик туфайли Трамп сайловолди кампаниясини тўхтатишига тўғри келган — унинг иштирокидаги барча тадбирлар бекор қилинган ёки онлайн-форматга ўтказилган. Унинг Жо Байден билан кейинги дебати 15 октябрь куни бўлиб ўтиши керак.
Мавзуга доир:
Изоҳ (0)