Озарбайжон президенти Илҳом Алиев мамлакат ҳарбийларининг Жаброил (Мехакаван) шаҳри ва Тоғли Қорабоғдаги бир нечта қишлоқни ўз назоратига олганини эълон қилди.
Арманистон мудофаа вазирлиги Алиевнинг ушбу баёноти дезинформация ва ҳақиқатдан йироқлигини билдирган, деб ёзмоқда «ТАСС».
Аввалроқ Озарбайжон ҳукумати Тоғли Қорабоғ шимолий қисмидаги Мадагиз қишлоғининг мамлакат қўшини ихтиёрига ўтганини эълон қилганди. Арманистон ушбу маълумот ҳам ҳақиқатдан йироқлигини билдирганди.
Жаброил (Мехакаван) шаҳри 1993 йилдан буён мустақиллиги тан олинмаган Тоғли Қорабоғ республикасининг ҳудуди ҳисобланади. 1991 йилги маълумотларга кўра, Жаброил шаҳрида 6,3 минг нафар аҳоли яшаган.
Тоғли Қорабоғ атрофидаги низо 1990 йиллар бошидан бери давом этиб келади ва 2020 йилнинг сентябрь ойида янада мураккаблашган. Икки томон вакиллари бир-бирларини асоссиз куч ишлатиш ва провокацияда айбламоқда.
Изоҳ (0)