Францияда сўнгги суткада 16 972 киши коронавирусга чалиниб, кунлик касалланиш бўйича рекорд янгиланди. «РБК»нинг ёзишича, бу ҳақда мамлакат Соғлиқни сақлаш вазирлигига бўйсунувчи Santé Publique France агентлиги маълум қилган.
Унда қайд этилишича, мамлакатда эпидемия бошланганидан буён коронавирус аниқланганлар сони 606 625 кишини ташкил қилган.
Аввалроқ иқтисодиёт соҳасидаги Альфред Нобель мукофоти номзодлари Эстер Дюфло ва Абхижит Банержи Франция расмийлари католикларнинг рождество байрамидан олдин бутун мамлакат бўйлаб ўзини изоляция қилиш режимини жорий қилишлари кераклигини айтган.
Иқтисодчиларнинг фикрига кўра, байрамдан олдин чекловлар жорий этиш иқтисодиётга салбий таъсир кўрсатади, аммо қариялар ва сурункали касалликларга эга кексаларни байрамдан кейин касалхонага ётқизишга тўғри келса, ундан ҳам каттароқ харажатларнинг олдини олиш мумкин.
Мамлакатда кунлик касалланиш бўйича аввалги антирекорд 24 сентябрь куни қайд этилган, шу куни 16096 кишида COVID-19 аниқланган.
Аввалроқ Францияда коронавирус билан касалланиш ҳолатлари сони тўрт баравар ошгани ҳақида хабар берилганди. Франция соғлиқни сақлаш вазири Оливье Веран COVID-19 тарқалиши билан боғлиқ вазият ёмонлашаётгани сабабли мамлакат аҳолисини ижтимоий муносабатларни камайтиришга чақирган. Шунингдек, вазир коронавирус тарқалиш хавфи юқори бўлган ҳудудларда иш берувчиларга иш режимини масофавий ташкил қилишни тавсия этган. Бундай ҳудудлар қаторидан Бордо, Лилль, Ницца, Париж ва Тулуза шаҳарлари ўрин олган.
Изоҳ (0)