Suriya hududidagi jangarilar mamlakat hududidan chiqib ketmasa, Turkiya ularga qarshi yangi harbiy operatsiya boshlashi mumkin. Bu haqda Turkiya prezidenti Rajab Toyyib Erdo‘g‘on ma’lum qilgan, deb xabar berdi NTV.
“Suriyada hali ham terrorchilar egalik qilayotgan hududlar mavjud, u yerlar bizga va’da qilinganidek, jangarilardan tozalanadi yoki biz borib, o‘zimiz bu ishni amalga oshiramiz” — degan u.
Erdo‘g‘on Anqaraning Suriyaning Idlib viloyatida yangi ijtimoiy fojia ro‘y bermasligi uchun har qanday choralar qo‘llashga tayyorligini bildirgan.
Sentabr oxirida Suriya TIV rahbari Valid Muallim Turkiya hamda AQShni mamlakat hududida bosqinchilik harakatlarini amalga oshirganlikda ayblagan. Vazirning so‘zlariga ko‘ra, Anqara Suriya hududida “Jabxat an-Nusra” terrorchilik guruhiga ko‘mak berishda davom etmoqda. Muallim Damashqning o‘z hududlari bosib olinishiga qarshi turishga tayyorligini aytgan.
Turkiyaning avvalgi harbiy operatsiyasi 2019-yil 9-oktabrda boshlangan va “Tinchlik bulog‘i” nomini olgandi. Ushbu harbiy harakatlar Anqara terrorchi deb hisoblovchi kurd jangari guruhlariga qarshi qaratilgan, mamlakat ularni Suriyadan siqib chiqarib, o‘z hududidagi qochoqlar uchun xavfsiz hudud tuzishni rejalashtirgandi. Keyinchalik 2019-yil 17-oktabrda AQSh hamda Turkiya Anqaraning harbiy operatsiyasini besh kunga to‘xtatishni kelishib oldi. Ushbu oraliqda kurd jangarilari guruhi urush ketayotgan hududni tark etishi lozim edi.
2019-yil 22-oktabrda Sochida o‘tgan muzokaralarda Rossiya prezidenti Vladimir Putin hamda Turkiya davlat rahbari Rajab Toyyib Erdo‘g‘on Suriya shimoli-sharqini inqirozdan olib chiqish borasida muzokaralar olib borib, kelishuv imzolagan.
Mavzuga doir: Dunyo siyosiy maydonidagi yana bir to‘qnashuv. Erdo‘g‘on va Asad o‘rtasidagi ziddiyatning oxiri nima bo‘ladi?
Rossiya mudofaa vazirligi Suriya qo‘shinlarining Idlibda “Xayyat Tahrir ash-Shom” guruhining jangarilariga qarshi urush olib borayotgani va ushbu guruhga Anqara homiylik qilishini bildirgan.
Keyinchalik 1-iyulda Rossiya, Turkiya hamda Eron davlat rahbarlari arab davlatining mustaqilligi va hududiy yaxlitligi haqida qo‘shma bayonotni e’lon qildi.
Izoh (0)