Россиялик сиёсатчи Алексей Навальний ўзининг заҳарланишида президент Владимир Путин шахсан алоқадор, деб ҳисобламоқда. Бу ҳақда Meduza хабар берди.
«Мен бу жиноят ортида Путин турганини таъкидлайман ва менда бўлиб ўтган воқеа бўйича бошқа версия йўқ», — деган россиялик мухолифатчи Германиянинг Der Spiegel нашрига берган интервьюда.
У, шунингдек, Германиядаги даволаниш курсидан сўнг Россияга қайтишини тасдиқлаган. «Менинг ҳозирги вазифам — қўрқмайдиган йигит бўлиб қолиш. Ва мен қўрқмайман ҳам!», — деган у.
Навальнийнинг аҳволи 20 августда Томск – Москва рейсида учаётган самолётда ёмонлашган, лайнер Омскга фавқулодда қўнишни амалга оширган. У ерда Навальний сунъий кома ҳолатида икки кун ётган, кейинчалик Берлиндаги «Шарите» клиникасига олиб кетилганди. Айни вақтда Навальний Германияда касалликдан кейин реабилитацияни ўтказмоқда.
Германия ҳукумати Навальнийга «Новичок» гуруҳига мансуб заҳар билан суиқасд уюштирилганини маълум қилган.
Россия президенти Владимир Путин Франция давлат раҳбари Эммануэль Макрон билан суҳбатда россиялик сиёсатчи Александр Навальнийнинг ўзи номаълум сабабларга кўра «Новичок» гуруҳига мансуб заҳарни ичган бўлиши мумкинлигини тахмин қилган, кейинчалик Навальний заҳарни ўзи қабул қилган бўлиши мумкинлиги тўғрисидаги Путиннинг тахминига жавоб қайтарганди.
Владимир Путин ва Эммануэль Макроннинг телефон суҳбатларига оид маълумотлар ОАВда тарқалиб кетгани юзасидан эса Франция Ташқи ишлар вазирлиги тергов ишларини бошлаган.
Изоҳ (0)