Чехияда 5 октябрдан COVID-19 билан боғлиқ вазиятнинг ёмонлашуви сабабли фавқулодда ҳолат режими жорий қилинади, деб хабар беради республика ҳукумати сайтига таяниб Meduza.
Режим мамлакатда 30 кун давомида амал қилади. Бу даврда 20 дан ортиқ одам иштирокидаги тадбирларни ўтказиш тақиқланади, спорт тадбирларида томошабинлар сони чекланади ва мактаблар масофавий ўқитиш тизимига ўтказилади.
Чехия Европада биринчилардан бўлиб коронавирус эпидемияси туфайли чегараларини ёпган. Чехия ҳукумати чет элликларнинг киришини ва фуқароларнинг чиқиб кетишини март ойининг ўрталарида — мамлакатда COVID-19 касаллигининг 117 та ҳолати қайд этилганда тақиқлади.
Жонс Ҳопкинс университетининг 1 октябрдаги маълумотларига кўра, Чехияда коронавирус билан боғлиқ қарийб 69 минг ҳолат қайд этилган. Беморларнинг 655 нафари вафот этган, 33 443 нафари касалликдан тузалган.
Аввалроқ Украина, Канада, Чехия, Австрия ва Грузияда ҳам коронавируснинг иккинчи тўлқини бошлангани ҳақида хабар берилган эди. Буюк Британияда COVID-19 билан боғлиқ вазият баҳордаги кўрсаткичга қайтмоқда. Бир ойдан бери туристлар учун очиқ бўлган Туркияда коронавирус тарқалиши яна авж олди. Исроил эса «герметик» карантин жорий қилди.
Изоҳ (0)