Туркияда 1923 йилдан буён биринчи марта, яъни замонавий Туркия республикасида янги христиан черкови қурилди. Бу ҳақда Туркиянинг TRT телерадиоканали хабар берди.
Авлиё Эфрайим православ черкови қурилиши рекорд даражада қисқа муддатда — атиги бир неча ойда якунланган. У Суриянинг насроний монофизитларнинг илтимосига биноан Истанбулнинг Европа қисмида жойлашган Бакиркой ҳудудида барпо этилган.
Сиғими тахминан 700 кишини ташкил қилувчи ушбу черковни 2021 йилнинг биринчи ярмида тантанали равишда очиш режалаштирилмоқда. Унинг яқинида Сурия православ черкови метрополитени, маҳаллий Сурия жамоатчилигини бошқарадиган Юсуф Четин қароргоҳи жойлашади.
Бугунги кунда мамлакатда қарийб 25 минг нафар суриялик христан, асосан Исантанбулнинг чеккаларида истиқомат қилади. Туркия ҳукумати ушбу диний жамоага алоҳида эътибор қаратади.
«Интерфакс»нинг ёзишича, Туркия ОАВлари Истанбулдаги Авлиё София музейини масжидга айлантириш натижасида юзага келган танқидлар фонида Туркия республикаси тарихидаги биринчи черковнинг қурилишини мамлакат раҳбариятининг муҳим қадами деб атади.
Эслатиб ўтамиз, Истанбулда Авлиё София музейини масжидга айлантирилиши борасидаги баҳс-мунозаралар 29 май куни Константинополнинг қулаши муносабати билан у ерда Қуръон хатм қилинганидан кейин бошланиб кетган. Орадан бир ҳафта ўтгач Эрдўғон ибодатхонани масжидга айлантириш имкониятини кўриб чиқишни буюрган. Кейинчалик адлия вазири Абдулҳамид Гул ҳамда ташқи ишлар вазири Мевлют Чавушўғлу ибодатхонанинг яна масжидга айлантирилиши тарафдори эканлигини билдирган.
Ғарб давлатларининг юқори мартабали амалдорлари, дипломатлар, жумладан, АҚШ давлат котиби Майкл Помпео ибодатхонанинг масжидга айлантирилишига қарши чиққанди.
Ражаб Тоййиб Эрдўғон Авлиё София мажмуасини масжидга айлантириш масаласида бошқа давлатларнинг фикри аҳамиятсиз эканини айтган, шунингдек, мамлакатда христианлик динига оид маданий мерос объектларининг ҳимоя қилинишини таъкидлаган ва мисол тариқасида Трабзондаги Панагия Сумела православ монастирининг қайта таъмирланганини қайд этганди.
Изоҳ (0)