Siyosatchi Aleksey Navalniy Rossiyada asab tizimini falaj qiluvchi, tarkibi jihatdan “Novichok” moddasiga o‘xshash jangovar modda bilan zaharlangan. Bu haqda Germaniya hukumati ma’lum qildi, deb yozmoqda Meduza.

Foto: “RBK”

Qayd etilishicha, siyosatchi davolanayotgan “Sharite” klinikasi shifokorlarining so‘roviga binoan o‘tkazilgan testlar natijalari Navalniyning organizmida zahar izlari mavjudligini ko‘rsatgan.

“Aleksey Navalniy Rossiyada kimyoviy zaharlovchi modda qo‘llagan holda amalga oshirilgan hujum qurboni bo‘ldi”, — deyiladi Germaniya hukumati bayonotida.

Ma’lum qilinishicha, Germaniya hukumati tahlil natijalari haqida Yevropa Ittifoqi va NATOdagi hamkorlariga, shuningdek, Kimyoviy qurolni taqiqlash bo‘yicha tashkilotga xabar beradi.

Rossiyaning Germaniyadagi elchisi ham tahlil natijalari haqida rasman xabardor qilinadi. “Biz Rossiya hukumatini bu hodisa bo‘yicha tushuntirish berishga chaqiramiz”, — deyiladi bayonotda.

Rossiya Tashqi ishlar vazirligining ma’lum qilishicha, Navalniyning zaharlangani munosabati bilan Rossiya Bosh prokuraturasi tomonidan bir necha kun oldin Germaniyaga jo‘natilgan so‘rovga javob kutmoqda. Rossiya prezidenti matbuot kotibi Dmitriy Peskovning ma’lum qilishicha, hozircha Kremlga Germaniya hukumatidan hech qanday ma’lumot kelib tushmagan.

Aleksey Navalniy 20-avgustdan buyon koma holatida. Komadagi dastlabki ikki kunni siyosatchi Rossiyaning Omsk shahridagi klinikada o‘tkazdi, shundan so‘ng u Berlinga olib ketildi. Siyosatchining safdoshlari hodisaning boshidan buyon uning zaharlanganini aytib kelmoqda. Ularning gumon qilishicha, rossiyalik shifokorlar siyosatchining organizmida zahar izini topish qiyin bo‘lishi uchun uni ataylab klinikada ushlab turgan va ketishiga ruxsat bermagan bo‘lishi mumkin.

“Sharite” klinikasi shifokorlari Navalniy yetib kelganidan keyin ikki kun o‘tib uning xolinesteraza ingibitorlari guruhidan bo‘lgan modda bilan zaharlanganini ma’lum qilgan.

Rossiyalik shifokorlarning ma’lum qilishicha, Navalniyning Rossiyada olingan tahlillari uning organizmida qandaydir zahar borligini aniqlamagan. Rossiya Bosh prokuraturasi tekshiruv o‘tkazgan. Uning natijasiga ko‘ra, hodisa munosabati bilan jinoiy ish ochishga asos mavjud emas deb topilgan.