Франция ҳукумати кўчма циркларда ёввойи ҳайвонлар чиқишларидан фойдаланиш ва делифинарийлар қуришни тақиқловчи қонун қабул қилмоқчи. Бу ҳақда «Коммерсантъ»га таяниб, «Gazeta.uz» хабар берди.
Мамлакат атроф-муҳитни ривожлантириш вазири Барбара Помпили 29 сентябрь куни ҳукумат кўчма циркларда ёввойи ҳайвонлар чиқишларидан фойдаланишни тақиқловчи қонунни қабул қилишини маълум қилган. Вазирнинг билдиришича, ушбу ҳайвонларнинг кейинги тақдири ҳар бир ҳолатда алоҳида ўрганилади, лекин улар аниқ эркинликка қўйиб юборилмайди.
Бундан ташқари, ҳукумат дельфинарийларга дельфинлар ва касаткалар кўпайтиришни ман этади. Ҳозирда мамлакатда учта дельфинарий фаолият олиб бормоқда, улар қайта профилланади, янгиларини қуриш эса тақиқланади.
Умумий ҳисобда ҳукумат цирк ва дельфинарийларни янги қонунчилик талабларига қийинчиликсиз мослашиши учун уларни қўллаб-қувватлашга қарийб 8 миллион евро ажратмоқчи. Мўйнасини олиш мақсадида қоракузанларни кўпайтириш ҳам тақиқланади.
Барбара Помпили аниқ муддатни айтмаган, лекин тегишли қонунлар иложи борича тезроқ қабул қилиниши учун ҳукумат бор имкониятини ишга солишини таъкидлаган.
Дунёнинг кўплаб мамлакатларида денгиз сутемизувчиларини тижорий мақсадда эксплуатация қилишга қарши тинч ҳаракатлар бўлиб ўтмоқда. Уларнинг айримларида, хусусан, Буюк Британия, Коста-Рика, Чили, Венгрия, Ҳиндистон, Австралия, Бельгия, Германия, Исроил, Аргентина, Канада, Мексика, Хорватияда бу қонун билан тақиқланган.
Марказий Осиёда Қозоғистон дельфинарийларни ёпишни режалаштирмоқда. Бу борадаги норма «Ҳайвонларга нисбатан масъулиятли муносабатда бўлиш тўғрисида»ги қонун лойиҳасига киритилган. Тақиқлаш тўғрисида петицияни мамлакатдаги ҳайвонларни ҳимоя қилувчи фаоллар киритган бўлиб, улар дельфинарийларни ёпиш ва ҳайвонларни озод қилишни сўраб, президент, экология, геология ва табиий ресурслар вазирига мурожаат этган.
Изоҳ (0)