Rossiyalik siyosatchi Aleksey Navalniy o‘zining zaharlanishida prezident Vladimir Putin shaxsan aloqador, deb hisoblamoqda. Bu haqda Meduza xabar berdi.
“Men bu jinoyat ortida Putin turganini ta’kidlayman va menda bo‘lib o‘tgan voqea bo‘yicha boshqa versiya yo‘q”, — degan rossiyalik muxolifatchi Germaniyaning Der Spiegel nashriga bergan intervyuda.
U, shuningdek, Germaniyadagi davolanish kursidan so‘ng Rossiyaga qaytishini tasdiqlagan. “Mening hozirgi vazifam — qo‘rqmaydigan yigit bo‘lib qolish. Va men qo‘rqmayman ham!”, — degan u.
Navalniyning ahvoli 20-avgustda Tomsk – Moskva reysida uchayotgan samolyotda yomonlashgan, layner Omskga favqulodda qo‘nishni amalga oshirgan. U yerda Navalniy sun’iy koma holatida ikki kun yotgan, keyinchalik Berlindagi “Sharite” klinikasiga olib ketilgandi. Ayni vaqtda Navalniy Germaniyada kasallikdan keyin reabilitatsiyani o‘tkazmoqda.
Germaniya hukumati Navalniyga “Novichok” guruhiga mansub zahar bilan suiqasd uyushtirilganini ma’lum qilgan.
Rossiya prezidenti Vladimir Putin Fransiya davlat rahbari Emmanuel Makron bilan suhbatda rossiyalik siyosatchi Aleksandr Navalniyning o‘zi noma’lum sabablarga ko‘ra “Novichok” guruhiga mansub zaharni ichgan bo‘lishi mumkinligini taxmin qilgan, keyinchalik Navalniy zaharni o‘zi qabul qilgan bo‘lishi mumkinligi to‘g‘risidagi Putinning taxminiga javob qaytargandi.
Vladimir Putin va Emmanuel Makronning telefon suhbatlariga oid ma’lumotlar OAVda tarqalib ketgani yuzasidan esa Fransiya Tashqi ishlar vazirligi tergov ishlarini boshlagan.
Izoh (0)