Украинанинг Харьков вилоятида Ан-26 самолёти фалокатга учраши оқибатида 25 киши ҳалок бўлгани хабар қилинганди. Ушбу фалокат қурбонлари сони 26 нафарга етди, дея хабар бермоқда «Интерфакс».
«26 сентябрь соат 10:50 ҳолатига кўра, авиаҳалокат натижасида касалхонада оғир аҳволда бўлган одам вафот этди», – дейилади Украина давлат фавқулодда вазиятлар хизмати матбуот хизмати хабарида.
Шундай қилиб, авиаҳалокат қурбонлари сони 26 кишига етган.
Бортда жами 27 киши бўлган. Яна бир одам касалхонада қолмоқда. У Харьков миллий ҳаво кучлари университетининг учинчи курс талабаси экани айтилмоқда. Ярадор курсант тез орада касалхонадан чиқарилиши мумкин.
«Ҳаётига хавф йўқ, дорилар етарли. Унинг аҳволи барқарор. Ўйлайманки, яқин кунларда курсантни соғлиғи сабабли навбатдаги таътилга чиқариш масаласини кўриб чиқамиз», – дейди Шимолий вилоят ҳарбий тиббий клиник маркази (Харьков ҳарбий касалхонаси) раҳбари Эдуард Хорошун.
Эслатиб ўтамиз, Украина Ҳарбий-ҳаво кучларининг Ан-26 самолёти 26 сентябрь куни тунда Чугуев аэропортига қўнаётганда қулаб тушди. У ўқув парвозини амалга ошираётган бўлган. Самолёт бортида Кожедуб номидаги Украина Ҳарбий-ҳаво кучлари Харьков университетининг 20 нафар курсанти ва етти нафар зобити бўлган.
26 сентябрь куни Украина мудофаа вазири Андрей Таран ҳалокатга учраган Ан-26 самолёти қаноти билан ерга қулаган бўлиши мумкинлигини айтди. Таъкидланишича, 26 сентябрь Харьков вилоятида ҳалок бўлганлар хотирасида Мотам куни деб эълон қилинган.
Аввалроқ Россияда Су-30 қирувчи самолёти ҳалокатга учрагани хабар қилинганди.
Изоҳ (0)