Швеция ҳам бир қатор хориж давлатлари каби Беларуснинг қонуний президентига айланган Александр Лукашенкони тан олмади. Бу ҳақда Швеция ташқи ишлар вазири Анн Линде маълум қилган.
Унинг сўзларига кўра, шошилинч равишда ўтказилган инаугурация Лукашенконинг қонуний равишда президентликка сайланганини шубҳа остида қолдирмоқда.
«Эълон қилмасдан, шошилинч равишда инаугурация ўтказилиши демократик етакчининг қонуний йўл билан ҳокимият тепасида қолмаганидан дарак бермоқда. 9 августдаги сайловлар очиқ ва демократик тарзда ўтмаган. Биз Лукашенкони мухолифатга қарши зўравонлик қилганлиги ва тинчлик билан норозилик билдираётган намойишчиларга нисбатан куч ишлатганликда айблаяпмиз», – деб ёзган вазир.
Норвегия давлат котиби Аудун Халворсен ҳам ҳалол бўлиб ўтмаган сайловлар ва махфий равишда ўтказилган инаугурация Лукашенконинг қонуний давлат раҳбари эканлигини шубҳа остида қолдираётганини қайд этган.
«Ярим махфий равишда ўтган инаугурация қонунийликда далолат эмас. Лукашенконинг инаугурацияси Беларусдаги сиёсий инқирозни янада оғирлаштирди. Норвегия ТИВ мамлакат ҳукуматини мухолифатга нисбатан зўравонлик қилмасликка ва можарони музокаралар билан ҳал этишга чақиради. Сайловлар ҳалол ва эркин ўтмаган», – деб ёзган Халворсен Twitter’да.
Эслатиб ўтамиз, Лукашенконинг инаугурациясидан кейин бир қатор давлатлар унинг қонуний тарзда президентликда қолганини тан олмаган, хусусан, Украина ушбу жараёнга қарши чиққан. Украина ТИВ раҳбари Дмитрий Кулеба Киевнинг Лукашенко қонуний йўл билан президент бўлган деб ҳисоблашини айтган.
Кейинчалик Кремль ҳам Лукашенконинг президентликда қолганини тан олмаганига муносабат билдирган. Путиннинг матбуот котиби Дмитрий Песков хориж давлатларининг Лукашенкони президент сифатида тан олинмагани, Россия—Беларусь муносабатларига таъсир кўрсатмаслигини таъкидлаган.
Изоҳ (0)