Қозоғистонда бир ҳафта ичида яна 5837 кишида, Қирғизистонда эса 755 кишида коронавирус аниқланди

Қозоғистонда ўтган бир ҳафта ичида коронавирус инфекцияси билан касалланганлар сони 5837 кишига ортиб, мамлакатдаги жами касаллар сони 107 659 кишига етди. Бу ҳақда Соғлиқни сақлаш вазирлигига таяниб, Tengrinews хабар берди.

Ҳозирга қадар COVID-19 инфекциясини юқтириб олган беморларнинг 102 659 нафари соғайган, 1719 киши коронавирус асоратлари оқибатида вафот этган. Шунингдек, Қозоғистонда 1 августдан буён пневмония билан касалланиш бўйича 32 233 та ҳолат қайд этилган бўлиб, беморларнинг 347 нафари вафот этган.

Коронавирусга чалиниш бўйича ҳолатлар қуйидаги ҳудудларда аниқланган:

• Олмаота шаҳри — 14 367;
• Нур-Султон шаҳри — 14 064;
• Атирау вилояти — 11 072;
• Қарағанда вилояти — 10 251;
• Шарқий Қозоғистон вилояти — 8661;
• Ғарбий Қозоғистон вилояти — 6852;
• Чимкент шаҳри — 5188;
• Олмаота вилояти — 4957;
• Жамбил вилояти — 4122;
• Шимолий Қозоғистон — 4076;
• Павлодар вилояти — 3901;
• Костанай вилояти — 3478;
• Ақмўла вилояти — 3476;
• Туркистон вилояти — 3374;
• Манғистов вилояти — 3338;
• Қизилўрда вилояти — 3242;
• Ақтўбе вилояти — 3240.

Аввалроқ Қозоғистонда COVID-19’га чалинган 1,9 мингдан ортиқ тиббиёт ходимига товон пули тўланиши тўғрисида хабар берилганди.

Қирғизистонда 19 сентябрдан 26 сентябрга қадар коронавирус билан касалланиш бўйича яна 755 та ҳолат аниқланди. Бу ҳақда мамлакат Соғлиқни сақлаш вазирлигига таяниб, Kloop хабар берди.

Коронавирусга чалиниш бўйича ҳолатлар қуйидаги ҳудудларда аниқланган:

• Чуй вилояти — 4839;
• Ўш вилояти — 3688;
• Жалолобод вилояти — 3428;
• Иссиқкўл вилояти — 3081;
• Боткен вилояти — 1792;
• Норин вилояти — 1562;
• Талас вилояти — 1263.

Мамлакатда пандемия бошлангандан буён COVID-19 аниқланганлар сони 46 090 кишини ташкил этмоқда.

Қирғизистонда ҳозирга қадар коронавирус инфекцияси оқибатида вафот этганлар сони 1063 кишилигича қолмоқда. Ўтган икки ҳафта ичида ушбу кўрсаткич ўзгармаган. Статистикага киритилган бу каби ўзгартириш ССВ томонидан амалга оширилган бўлиб, ёндош касалликка эга, хусусан, юрак касаллиги бор 400 та ҳолат олиб ташланган. Шу билан бирга, вазирлик статистикани ЖССТ методикаси бўйича қайта ҳисоблашга ваъда берган.

Афғонистонда ўтган бир ҳафта ичида яна 6610 кишида коронавирус инфекцияси аниқланди. Бу ҳақда мамлакат Соғлиқни сақлаш вазирлигига таяниб, Tolo News хабар берди.

Афғонистонда пандемия бошланганидан буён COVID-19 билан касалланганларнинг умумий сони 39 186 кишига етган, ҳозирга қадар 32 619 киши даволанган, 1451 киши вирус қурбонига айланган (ўтган бир суткада бирорта ўлим ҳолати қайд этилмаган).

Мамлакатдаги марказларида ҳозирга қадар 109,7 мингдан ортиқ тест намуналари олинган.

Тожикистонда сўнгги бир ҳафта давомида коронавирус билан касалланганлар сони 9562 кишига етди. Бу ҳақда мамлакат Соғлиқни сақлаш вазирлигига таяниб, Asia Plus хабар берди.

Ўтган бир ҳафта ичида яна 1536 кишида COVID-19 аниқланган. Ҳозирга қадар вирус қурбонлари сони 74 кишига етган (бир ҳафта давомида бир киши вафот этган), 8341 киши касалликдан даволанган.

Аввалроқ Тожикистон Соғлиқни сақлаш вазирлиги мамлакатда болаларнинг коронавирус билан касалланаётганини тасдиқлагани тўғрисида хабар берилганди.

Ўзбекистонда 26 сентябрь соат 10:00 ҳолатига кўра, коронавирус инфекцияси қайд этилганлар сони 54 660 нафарни ташкил этмоқда. Бу ҳақда Соғлиқни сақлаш вазирлиги хабар берди. Ҳозирга қадар мамлакатда 50 954 нафар коронавирус инфекциясига чалинган фуқаро (93 фоиз) соғайган. Айни пайтда 3255 нафар беморга шифокорлар томонидан белгиланган стандартлар бўйича даво чоралари кўрилмоқда. Улардан 718 нафари оғир, 289 нафари эса ўта оғир аҳволда.