Буюк Британиянинг Tesco савдо тармоғи мамлакатда карантин чораларининг кучайтирилиши муносабати билан бир қатор маҳсулотларнинг бир кишига сотиладиган миқдорига нисбатан чекловларни қайта жорий қилди. Чекловлар дўконлардаги ажиотаж ва захиралар тугаб қолишининг олдини олиш мақсадида ўрнатилди. Бу ҳақда «Интерфакс» хабар берди.
Энди харидорлар ун, макарон маҳсулотлари, ҳожатхона қоғози, болалар ва антибактериал нам салфеткаларни уч қадоқдан ортиқ сотиб ололмайди. Компания томонидан маълум қилинишича, шу тариқа ҳар бир харидор зарур нарсаларни харид қилишини таъминлаш режалаштирилмоқда.
Бундан ташқари, WM Morrison савдо тармоғи ҳам бир қатор маҳсулотлар, жумладан, ҳожатхона қоғози ва антисептик воситаларга нисбатан «бир кишига уч қадоқ» чекловини жорий қилган.
Буюк Британия ҳукумати коронавирус билан касалланиш ҳолатлари сонининг ошиши муносабати билан бир қатор чекловлар жорий қилди: бар ва ресторанларнинг иш вақти чекланди, офис ишчилари масофадан ишлашга ўтди. Мамлакатнинг алоҳида ҳудудларида чекланган карантин жорий қилинмоқда.
Маълум қилинишича, 2020 йилнинг март ойида карантин жорий қилинганидан кейин тўрт ҳафта ичида мамлакат аҳолиси уй учун зарур маҳсулотларга 10 миллиард фунт-стерлингдан ортиқ маблағ сарфлаган. Бу одатда Рождество байрамидан олдин қилинадиган харажатдан кўпроқ ҳисобланади.
Қайд этилишича, сўнгги кунларда янги карантин чоралари жорий қилиниши эҳтимоли сабабли баъзи дўконларнинг пештахталари бўшаб қолган. Tesco, Asda, Sainsbury's, Lidl ва Aldi каби йирик савдо тармоқлари уларда маҳсулотлар захираси етарли эканлигини ва тақчиллик кузатилмаслигини маълум қилган.
Буюк Британия савдо тармоқлари консорсиуми харидорларни одатий режимда харидларни амалга оширишга чақирган.
Изоҳ (0)