Polsha prezidenti Lex Kachinskiyning o‘limiga olib kelgan Tu-154M samolyotining falokatiga doir navbatdagi tergov komissiyasi Rossiyada samolyotni ta’mirlash vaqtida uning ichiga trotil solib qo‘yilgani ma’lum qilingan filmni namoyish etdi, deb xabar beradi Polsat News.

Foto: AP Photo

Smolenskda falokatga uchragan Tu-154Mning tergovi bo‘yicha birinchi Polsha komissiyasi falokatga samolyotning quyuq tuman sabab ruxsat etilgan minimum balandlikdan pastda uchganini sabab qilib ko‘rsatgan edi. Biroq 2012-yilda Polsha OAV voqea joyida topilgan portlovchi moddalar haqida yoza boshlagan.

“Fojia Tu-154Mni kapital ta’mirlash ishlari vaqtida qasddan amalga oshirilgan harkatlar natijasida yuzaga kelganiga shubha yo‘q… Polsha prezidenti va hukumat delegatsiyasining o‘limiga olib kelgan avariya va portlashga samolyotning aeroportga qo‘nishiga ming metr qolganda rossiyalik dispetcherlar tomonidan qasddan noto‘g‘ri yo‘nalish ko‘rsatilgani sabab bo‘lgan”, — deyiladi komissiya hisobotida.

“Polsha radiosi”ning ma’lum qilishicha, samolyot bortida ikki bor portlash ro‘y bergan – chap qanot sohasida va samolyotning markaziy bo‘lmasida. Samolyot parchalarida mutaxassislar trotil, geksogen va pentrit izlarini topgan. Portlash fakti samolyotning buzilish xarakteri, parchalarning sochilishi, shuningdek, halok bo‘lganlarning jarohatlari bilan tasdiqlanadi.

Shuningdek, Polsha samolyotining qulashi sabablarini o‘rgangan rossiyalik tergovchilar bortda sodir bo‘lgan portlashni yashirishga uringanlikda ayblangan.

Seymdagi (Polsha quyi palatasi) komissiya raisi, sobiq mudofaa vaziri Antoni Matserevich samolyotning so‘nggi daqiqalari modellashtirilgan videosini taqdim etgan.

Eslatib o‘tamiz, bortida Polsha prezidenti Lex Kachinskiy va mamlakat rahbariyati vakillari bo‘lgan Tu-154M samolyoti 2010-yil 10-aprelda Rossiyaning Smolensk aerodromiga qo‘nish chog‘ida qulagan. Sakkiz nafar ekipaj a’zosi va 88 yo‘lovchining barchasi halok bo‘lgan.