Тошкент шаҳрида ёши 100 ёшдан ошган дарахтлар хатловдан ўтказилмоқда, деб хабар беради ЎзА.
Дарахтларни хатловдан ўтказиш бўйича ишчи гуруҳга Атроф-муҳит ва табиатни муҳофаза қилиш технологиялари илмий-тадқиқот институти, Ўрмон хўжалиги илмий-тадқиқот институти ҳамда шаҳар ободонлаштириш бошқармаси мутахассислари жалб қилинган.
«Дарахтларни хатловдан ўтказишдан асосий мақсад — ушбу дарахтларга табиат ёдгорлиги мақомини беришдир. Хатлов натижаси бўйича ҳар бир ёши катта дарахт ўзи бир кичик табиат қўриқхонасига айлантирилади ва қатъий давлат муҳофазасига олинади», — дейилади хабарда.
Тадбир давомида 30 га яқин потенциал ёши катта дарахтнинг диаметри, бўйи ўлчанган. Дарахтлар 120-150 йиллик тарихга эга бўлиб, пресслер пармаси ёрдамида йиллик ҳалқалари саналган ва шу асосда ёши аниқланган.
Ишчи гуруҳ ўз ишини давом эттиради.
Эслатиб ўтамиз, Президентнинг тегишли фармони билан давлат ўрмон фондига кирмайдиган дарахтлар ва буталар қимматбаҳо навларининг кесилишига 2019 йил 1 ноябрдан 2020 йил 31 декабргача мораторий жорий этилган. Шунга қарамай, жойларда дарахтларнинг ноқонуний кесилиш ҳолатлари содир бўлмоқда.
Хусусан, 2020 йилнинг февраль ойида Тошкентда тадбиркор 81 та дарахтни кесиб ташлагани аниқланганди. Унинг ўсимлик дунёсига етказилган зарари 603 миллион 421 минг сўмни ташкил этган. Мамлакат раҳбарияти томонидан қонунбузарларга нисбатан аёвсиз чора кўрилган. 2 нафар айбланувчидан 1 миллиард 891,3 миллион сўм моддий зарар ундирилди, бир қатор масъуллар ҳайфсан олди.
Изоҳ (0)