Ўзбекистон Халқ таълими вазирлиги ҳозирча мактабдаги таътил кунларига ўзгартириш киритишни режалаштирмаган, деб хабар бермоқда вазирлик матбуот хизмати. Коронавирус пандемияси туфайли мамлакатда ўқув йили 14 сентябрдан бошланганди.
«Таътил кунларининг ўзгариши зарурияти юзага келганда Республика махсус комиссияси қарори билан амалга оширилади ва бу ҳақда кенг жамоатчилик хабардор қилинади», — деб қайд этилган вазирлик хабарида.
Амалдаги тартибга кўра ўқув йили 2 сентябрдан 25 майга қадар давом этади. Ўқув йил 34 ҳафтадан иборат 4 та чоракка бўлинади, ҳар бир чорак оралиғида таътиллар белгиланган.
Вазирлар Маҳкамасининг 2017 йилда тегишли қарори билан тасдиқланган низомга мувофиқ, таътил кунлари қуйидагича белгиланган:
- кузги таътил — 4 ноябрдан бошлаб 6 календарь кун;
- қишки таътил — 28 декабрдан бошлаб 14 календарь кун;
- баҳорги таътил — 21 мартдан бошлаб 7 календарь кун;
- ёзги таътил — 26 майдан- 1 сентябрга қадар давом этади.
Эслатиб ўтамиз, Тошкент шаҳар Халқ таълими бош бошқармаси 14 сентябрдан бошлаб 139 та мактаб ўз фаолиятини анъанавий шаклда бошлагани тўғрисида хабар берганди. Дарслар бошланганидан бир кун ўтиб, яъни 15 сентябрь куни Шайхонтоҳур туманидаги 40, 262-сонли мактабларда анъанавий ўқув жараёни коронавирус инфекцияси бўйича эпидемик вазият барқарор бўлгунга қадар вақтинчалик тўхтатилганди. Орадан икки кун ўтиб тумандаги яна бир мактабда анъанавий ўқув жараёни вақтинча тўхтатилди.
Изоҳ (0)