Ички ишлар вазирлиги «Ўзбекистон Республикаси Маъмурий жавобгарлик тўғрисидаги кодексининг 127-моддасига ўзгартириш ва қўшимча киритиш тўғрисида»ги қонун лойиҳасини муҳокамага қўйди.

Лойиҳа Вазирлар Маҳкамасининг 2020 йил 10 сентябрдаги 12-14-16/1-сон топшириғи ижросини таъминлаш мақсадида ишлаб чиқилган.

Қайд этилишича, республика ҳудудида автотранспорт воситалари сонининг кескин ортиши билан бир қаторда, айрим ҳайдовчилар томонидан аҳоли пунктларида транспорт воситаларининг магнитофон ва овоз чиқарувчи бошқа аппаратураларидан овозини баланд қилиб фойдаланиши ҳоллари ҳам учрамоқда. Бундай ҳаракатлар фуқароларнинг тинчлиги ва осойишталиги бузилишига сабаб бўлмоқда.

Статистик маълумотларга кўра, 2018 йилда 6466 нафар, 2019 йилда 9911 нафар ҳамда 2020 йилнинг ўтган 8 ойи мобайнида 8763 нафар (жами 25 140 нафар) транспорт воситалари ҳайдовчилари белгиланмаган жойларда фақатгина товуш сигналини сабабсиз бериши ва транспорт воситаларига уни ишлаб чиқарган корхона назарда тутмаган товуш чиқарувчи қурилмаларни ўрнатиши билан боғлиқ қоидабузарликларни содир этгани учун Маъмурий жавобгарлик тўғрисидаги кодексининг 127-моддаси билан маъмурий жавобгарликка тортилган.

Жаҳон соғлиқни сақлаш ташкилоти тавсияларида автомобиль салонида товуш баландлиги 85 децибелдан (дБ) баланд бўлмаслиги ҳамда кўпи билан 8 соат тинглаш тавсия этилган. Шу билан бир қаторда, товуш баландлиги 90 дБ бўлганда 2,5 соат, 95 децибелда 47 дақиқа, 100 децибелда 15 дақиқа, 105 децибелда 4 дақиқа, 115 децибелда 28 сония, 120 децибелда 9 сониядан ортиқ тинглаш инсон саломатлигига салбий таъсир қилиш ва карликка сабаб бўлиши мумкинлиги қайд этилади.

Лойиҳада Маъмурий жавобгарлик тўғрисидаги кодексининг 127-моддасининг биринчи қисмига қўшимчалар киритилиб, ушбу модда қуйидаги таҳрирда баён этилмоқда:

Мазкур модда биринчи қисмининг санкциясидаги базавий ҳисоблаш миқдорининг бир баравари миқдоридаги жарима уч баравари миқдорига ўзгартирилмоқда.

Йўл ҳаракати қоидаларига мувофиқ, транспорт воситаларининг товуш чиқарувчи, ёритувчи ва бошқа қурилмаларидан фойдаланиш, уларни ўрнатиш қоидаларини бузиш билан боғлиқ ҳуқуқбузарлик учун маъмурий чораларни кучайтириш, ҳайдовчиларнинг транспорт воситасини бошқариш жараёнида транспорт воситалари ҳайдовчилари билан муносабатдаги ўзаро бир-бирларига бўлган масъулиятини оширади.

Йўл ҳаракати иштирокчиларининг ҳуқуқлари, эркинликлари ва қонуний манфаатлари ҳимоясини таъминлаш билан боғлиқ фаолиятнинг таъсирчанлигини оширади.

Фуқароларнинг осойишталиги ва нормал дам олишларига ҳамда инсон саломатлигига салбий таъсир қилиш омилларини камайтиради.

Хорижий тажрибани ўрганиш транспорт воситаларининг товуш чиқарувчи, ёритувчи ва бошқа қурилмаларидан фойдаланиш, уларни ўрнатиш қоидаларини бузиш билан боғлиқ ҳуқуқбузарлик учун маъмурий қатъий жазо чоралари қўлланилишини кўрсатмоқда. Масалан, Сингапурда белгиланмаган жойларда товуш сигналларини сабабсиз бериш 1,5 минг маҳаллий долларда (5,4 миллион сўм) жарима жазоси қўлланилиши белгиланган.

Россияда 2020 йил августда қонунчиликка мазкур соҳадаги ҳуқуқбузарликлар учун жавобгарликни сезиларли даражада кучайтиришга қаратилган ўзгартиришлар таклиф этилиб, унга мувофиқ, аҳоли ҳамда белгиланмаган жойларда сабабсиз товуш сигналларини бериш учун маъмурий жарима миқдори 10 бараварга оширилиб, 10 минг рублга (1,370 миллион сўм атрофида) белгиланиши кўзда тутилган.

Қайд этилишича, қонун лойиҳасининг қабул қилиниши Давлат бюджетидан қўшимча харажатлар талаб қилмайди.

«Менинг фикрим» жамоавий мурожаатлар порталида фуқаролардан автотранспорт воситасининг суғуртаси йўқлиги туфайли автотранспорт эгасига маъмурий жарима қўллаган ҳолда автотранспорт воситасини жарима майдонига қўйиш амалиётини бекор қилиш ҳақидаги таклиф билан мурожаат қилинган ва мазкур мурожаат порталда 10 000 дан ортиқ овоз тўплагани тўғрисида хабар берилганди.