Бош прокурор ўринбосари Чироқчи ва Андижондаги қийноқ ҳолатларини «кетмас доғ» деб атади

19 сентябрь куни Ўзбекистон Республикаси Бош прокуратурасида «Республикада жиноятчиликнинг олдини олиш ва унга қарши курашиш самарадорлигини ошириш»га бағишланган тезкор йиғилиш ташкил этилди. Бу ҳақда Бош прокуратура матбуот хизмати «Дарё»га маълум қилди.

Унда Бош прокурорнинг биринчи ўринбосари Абдуҳалим Холмахматов маъруза қилиб, ҳозирги куннинг долзарб ва оғриқли, Ўзбекистон Президенти ва жамоатчилик норозилигига сабаб бўлаётган муаммолар – ҳуқуқни муҳофаза қилувчи идоралар ходимлари томонидан фуқароларга тазйиқ ўтказиш, уриш, дўппослаш, қийноққа солиш ва бошқа шафқатсиз, ғайриинсоний ёки қадр-қимматни камситувчи ҳаракатлар содир этилишига чек қўйилмаётганлигига алоҳида тўхталди.

Чироқчи тумани ва Андижон шаҳрида ички ишлар ходимлари томонидан фуқаролар калтакланиб, қийноққа солиниши оқибатида вафот этганлиги ички ишлар органлари, қолаверса бутун ҳуқуқни муҳофаза қилувчи идораларнинг номига кетмас доғ тушишига сабабчи бўлаётганлиги таъкидланди. Жиноятларни рўйхатга олиш, уларни фош этиш ва тезкор қидирув тадбирларининг ўз вақтида тўлақонли олиб борилиши, ҳуқуқбузарликларнинг барвақт олдини олиш, бу борада прокурор назоратига танқидий муносабат билдирилди. Йиғилишда ёшлар ва аёллар жиноятчилиги ҳақида сўз юритилиб, маҳалла ва оилаларда ўзаро тотувликни таъминлаш, низо ва зиддиятларни бартараф этилиши самарасизлиги ҳуқуқбузарликларнинг келиб чиқишига омил бўлиб хизмат қилаётганлиги таъкидланди.

Онлайн тарзда ўтказилган йиғилишда ички ишлар вазирининг биринчи ўринбосари Шуҳрат Собиров, маҳалла ва оилани қўллаб-қувватлаш вазирининг биринчи ўринбосари Гулнора Маъруфова, тегишли бошқармалар бошлиқлари, вилоятлар ва уларга тенглаштирилган прокурорларнинг соҳа бўйича ўринбосарлари, туман (шаҳар) прокурорлари ва ички ишлар бўлимлари бошлиқлари, Маҳалла ва оилани қўллаб-қувватлаш бошқармалари бошлиқлари иштирок этган. Фаолиятда йўл қўйилган камчиликлар юзасидан ҳудудий раҳбар ҳамда масъул ходимларнинг изоҳ ва тушунтиришлари эшитилган.

Таъкидлаш лозим, Президент Шавкат Мирзиёев Чироқчи ва Андижонда ИИБ ходимларининг фуқароларни калтаклаши билан боғлиқ воқеалар учун соҳа раҳбарларини танқид қилганди. Инсон ҳуқуқлари бўйича Миллий марказ Андижонда фуқаронинг ИИБ томонидан қийноққа солинганини қатъий қоралаганди. Олий Мажлис Қонунчилик палатаси спикери ўринбосари, «Адолат» СДП сиёсий кенгаши раиси Наримон Умаров бир фуқарони қийноққа солиб, унинг ўлимига сабаб бўлган Андижон шаҳар ИИБ ходимлари ҳаракатига муносабат билдириб, Андижон шаҳар ИИБ ходимларининг ноўрин муносабати асносида касб шаъни оёқости қилингани, бир инсон энг олий ҳуқуқи бўлган яшаш неъматидан мосуво бўлгани, шу билан бирга, мамлакат раҳбарияти ва аҳоли томонидан давлатнинг халқаро имижини яхшилаш учун қилинаётган кўп сонли ҳаракатларга путур етганини таъкидлаганди.