Россия президенти Владимир Путиннинг маълум қилишича, унинг қизи коронавирусга қарши Россияда яратилган вакцинанинг синовида кўнгилли сифатида қатнашган ва ўз касбидан келиб чиқиб, қарорни ўзи қабул қилган. Путин қизларидан бири коронавирусга қарши вакцина билан эмлангани ҳақида мазкур вакцинанинг рўйхатдан ўтказилганини маълум қилиш чоғида айтганди, деб ёзмоқда «Интерфакс».
Путиннинг сўзларига кўра, унинг қизи иш юзасидан кўплаб одамлар билан мулоқот қилади. «Яхши ишлаш учун ўзининг ҳимояланганини ҳис этиш керак», — дея маълум қилган Путин.
Вакцина қабул қилинганидан кейин биринчи куни президентнинг қизида тана ҳарорат 38,4 даражага кўтарилган, иккинчи куни эса ҳарорат 37 даражага тушган, унда коронавирусга қарши антитаналар шаклланган.
«21 кундан кейин қилинган иккинчи эмлашдан сўнг ҳам ҳарорат бироз кўтарилган, бироқ ҳаммаси жойида. Мен у билан фақат телефонда гаплашдим. У ўзини яхши ҳис қиляпти, худога шукур», — деган Россия президенти.
Гап Россия Соғлиқни сақлаш вазирлиги ҳузуридаги Гамалея институти томонидан яратилган «Спутник V» вакцинаси ҳақида борган. Ҳозирда мазкур вакцинанинг клиник синовлари давом этмоқда. Вакцина Гамалея институти ва «Биннофарм» компанияси томонидан ишлаб чиқарилади.
Институт директори Александр Гинцбургнинг айтишича, у кўнгиллилар орасида президентнинг қизини танимаган.
Путиннинг қўшимча қилишича, сентябрь ойида Новосибирскдаги «Вектор» илмий-тадқиқот маркази томонидан яратилган иккинчи Россия вакцинаси пайдо бўлиши керак. Президентнинг фикрича, иккала вакцина ҳам бир хилда хавфсиз ва самарали бўлади ҳамда ўзаро рақобат қилади.
Аввалроқ Россияда грипп ва коронавирусга қарши ягона вакцина яратилаётгани ҳақида хабар берилганди.
Эслатиб ўтамиз, Россиянинг Гамалея институти томонидан яратилган вакцина 11 август куни вақтинчалик рўйхатдан ўтиш гувоҳномасини олди. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади. Россияда коронавирусга қарши ушбу вакцинани оммавий қўллаш октябрь ойидан бошланади.
Россиянинг фармацевтика компаниялари ва илмий-тадқиқот ташкилотларини бирлаштирган Клиник тадқиқотлар ташкилотлари ассоциацияси Гамалея номидаги Эпидемиология ва микробиология марказида ишлаб чиқилган вакцина етарлича синовдан ўтказилмагани учун уни рўйхатдан ўтказишни кечиктиришга чақирганди. Бунга жавобан Россиянинг Соғлиқни сақлашни назорат қилиш федерал хизмати («Росздравнадзор») ушбу вакцина билан бир неча юзлаб кўнгиллилар эмлангани ва уларда вакцинага нисбатан жиддий ножўя таъсирлар кузатилмаганини маълум қилган. Шунингдек, Россия Соғлиқни сақлаш вазирлигининг штатдан ташқари бош эпидемиологи Николай Брико COVID-19’га қарши вакцинани яратишда аденовирус асосида бир хил технология ишлатилганини, шунинг учун бу ҳолда у қайта кўриб чиқишга, кечиктиришга муҳтож эмаслигини билдирган.
Британиянинг Рединг университети вирусология профессори Иэн Жонснинг билдиришича, учинчи босқич синовларидан ўтмаган коронавирусга қарши вакцинани қабул қилиш натижасида вирус мутацияга учраб, янги штаммни ҳосил қилиши, у эса кейинчалик бошқа барча вакциналарни ҳам четлаб ўтадиган бўлиши эҳтимолдан холи эмас.
Россияда мазкур вакцинани оммавий равишда қўллаш 2020 йил октябрь ойидан бошланади. Эмлаш билан бир вақтда вакцинанинг клиник тадқиқотларининг учинчи фазаси ҳам олиб борилади.
Изоҳ (0)