Европа Иттифоқининг савдо бўйича комиссари Фил Хоган коронавирус пандемияси туфайли жорий этилган қоидани бузгани сабабли келиб чиққан можаро туфайли истеъфога чиқди. Унинг истеъфога чиқиш ҳақидаги аризасини The Irish Times нашри эълон қилган.
Маълум бўлишича, у гольф-клуб томонидан Ирландия ғарбида уюштирилган зиёфатга борган. Зиёфатда Фил Хогандан ташқари 80 дан ортиқ меҳмон бўлган. Ирландияда эса айни пайтда оммавий маросимлар ўтказиш тақиқланган.
Фил Хоган ўз аризасида баён этишича, унинг Ирландияга ташрифи ортидан келиб чиққан можаролар уни ишдан чалғитди ва келгуси ойлардаги фаолиятига путур етказиши мумкин эди.
«Менинг Ирландияга ташрифим шундай хавотир, ваҳима ва кўнгилсизлик уйғотганидан афсусдаман. Мен Ирландияда COVID-19 туфайли жорий этилган барча чекловларга доим амал қилишга ҳаракат қилганман ва соғлиқни сақлаш тизими кўрсатмаларига риоя этиб келяпман, айниқса COVID-19’га тест синовларим манфий чиққандан кейин», — деган Хоган.
У, шунингдек, ташриф давомида йўл қўйган хатолари учун Ирландия халқидан узр сўраган ва у жамоат вакили сифатида коронавирус билан боғлиқ тавсияларга қатъийроқ амал қилиши лозим бўлганини тан олган.
Аввалроқ Шотландия бош шифокори карантинни бузгани учун истеъфога чиққани хабар берилган эди.
Изоҳ (0)