АҚШда коронавирусни 15 дақиқада аниқлаб берувчи 5 долларлик экспресс-тестлар сотиш бошланади

Американинг Abbott Laboratories фармацевтика компанияси улар томонидан ишлаб чиқилган COVID-19’ни аниқловчи экспресс-тестдан фойдаланиш АҚШнинг Озиқ-овқат маҳсулотлари ва дори воситалари сифати бўйича санитария назорати бошқармаси (FDA) томонидан маъқулланганини маълум қилди. Компания BinaxNOW тестларини 5 доллардан сотишни режалаштирмоқда.

Организмда вирус бор-йўқлигини текшириш учун буруннинг шиллиқ қаватидан суртма олинади, тест натижаси 15 дақиқадан сўнг тайёр бўлади.

Компания тестнинг натижани тезкор чиқариб бериши, унинг пластик картадек келувчи кичкина ҳажмга эгалигини ҳисобга олиб, унга биринчи навбатда тиббиёт ва ўқув муассасаларида талаб катта бўлишига умид қилмоқда.

Қайд этилишича, Abbott Laboratories сентябрь ойида буюртмачиларга бир неча ўн миллион тўпламлар етказиб бермоқчи, октябрь ойида эса ишлаб чиқариш ҳажмини ойига 50 миллион донага етказади.

BinaxNOW’дан фойдаланишга рухсат FDA томонидан соддалаштирилган тартибда берилган бўлиб, бундай тартиб фавқулодда вазиятларда қўлланилади ва пандемия шароитига ҳам татбиқ этилади.

Аввалроқ АҚШдаги Жорж Вашингтон университети тадқиқотчилари мобил телефонлар ёрдамида коронавирусни аниқловчи кичик қурилма яратгани, Эронда коронавирусни ярим дақиқада аниқловчи нанотест яратилгани хабар берилган эди.