Трамп Висконсиндаги тартибсизликларни бартараф этиш учун Миллий гвардияни юбориш бўйича топшириқ берди
АҚШ президенти Дональд Трамп Висконсин штати ҳукуматига Кеноша шаҳрига федерал кучлар ва Миллий гвардия ҳарбий хизматчиларини юбориш бўйича топшириқ берди. Бу ҳақда Трамп ўзининг Twitter’даги саҳифаси орқали маълум қилган.
«Бугун мен федерал ҳуқуқ-тартибот органлари ва Миллий гвардия вакилларини Кеноша шаҳридаги тартибни қайта тиклаш учун юбораман», — деб ёзади Трамп.
Трамп жамоаси вазиятни Висконсин штати губернатори Тони Иверс билан муҳокама қилган бўлиб, у федерал ёрдамни қабул қилишга рози бўлган.
«Биз Америка кўчаларида ўғрилик, босқинчилик, зўравонлик ва қонунсизликка чидаб турмаймиз», — дейди Америка етакчиси.
Висконсин штати губернаторининг сайтида маълум қилинишича, Иверс Кеношага 500 нафар Миллий гвардия аскарини юбориш бўйича топшириқ берган. Баёнотда келтирилишича, ҳукумат «кечагача маҳаллий ҳуқуқ-тартибот органлари ходимларига ёрдам бериш учун етиб боради».
Таъкидланишича, 24 июль куни губернатор штат Миллий гвардиясига «муҳим объектларни қўриқлаш ва жамоат хавфсизлигини таъминлашда ёрдам бериш» бўйича кўрсатма берган. 25 июль куни Кеноша округидаги Миллий гвардия аскарлари сони 250 кишига етказилган.
Эслатиб ўтамиз, 23 август куни Висконсинда маҳаллий полициячилар Жейкоб Блейк исмли қора танли эркакка қарата етти марта ўқ узганидан сўнг норозилик намойишларининг янги тўлқини бошланди. Шаҳарда оммавий тартибсизликлар бошланган, одамлар автосалон ва автомобилларни ёқиб юборган.
