Президент Шавкат Мирзиёев 26 август, чоршанба куни «Аҳолини ижтимоий қўллаб-қувватлашга қаратилган қўшимча чора-тадбирлар тўғрисида»ги қарорни имзолади.

Фото: «Дарё»

Қарорга мувофиқ, 2020 йилнинг сентябрь ойида аҳолининг қуйидаги қатламларига бир марталик моддий ёрдам кўрсатилади:

  • моддий ёрдам ва кўмакка муҳтож оилаларнинг рўйхатларига («темир дафтар») киритилган оилаларнинг 16 ёшга тўлмаган болаларига;
  • боқувчисини йўқотганлик пенсияси ёки нафақасини олувчи оилаларнинг 16 ёшга тўлмаган болаларига;
  • ногиронлиги бўлган 16 ёшга тўлмаган болаларга.

Алоҳида қайд этилишича, юқорида санаб ўтилган аҳоли қатламлари учун назарда тутилган бир марталик моддий ёрдам миқдори ҳар бир 16 ёшга тўлмаган бола учун 500 минг сўмни ташкил этади. Бундай моддий ёрдам билан 810 мингдан ортиқ болалар қамраб олинади, бунинг учун 400 миллиард сўм миқдорида бюджет маблағлари сарфланади.

Вазирлар Маҳкамасига белгиланган бир марталик моддий ёрдам учун зарур маблағларни Президентининг 2020 йил 30 июлдаги «Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида»ги фармонида назарда тутилган ҳамда бошқа қўшимча манбалар ҳисобидан амалга ошириш ҳақида кўрсатма берилган.

Қарор ижросини назорат қилиш бош вазир ўринбосарлари Жамшид Қўчқоров, Беҳзод Мусаев, Қорақалпоғистон Вазирлар Кенгаши раиси, вилоятлар ва Тошкент шаҳар ҳокимлари зиммасига юклатилган.

Қайд этилишича, ушбу ҳужжат «халқимизнинг тарихий ва маънавий қадриятларини намоён этган ‘Саховат ва кўмак‘ умумхалқ ҳаракатини давом эттириш ҳамда моддий ёрдам ва кўмакка муҳтож оилаларнинг болаларини қишки кийим-бош тўпламлари, мактаб формаси ва ўқув қуроллари билан таъминлаш мақсадида» қабул қилинган.

Эслатиб ўтамиз, Қурбон ҳайити байрами арафасида республика бюджетидан «Саховат ва кўмак» жамғармаси орқали 150 минг оила 1 миллион сўмдан моддий ёрдам олганди. Шунингдек, 15 августгача 400 мингдан кўпроқ оиланинг ҳар бир аъзоси учун 220 минг сўм миқдорида моддий ёрдам берилиши белгиланганди. Кейинроқ яна 150 мингдан ортиқ оила моддий ёрдам олиши маълум бўлди.