Самарқанд вилоятида ўзганинг пластик карточкасидан 2 миллион 790 минг сўм ўғирлаган «уддабурон»га жиноят иши қўзғатилди. Бу ҳақда «Дарё»га Самарқанд вилоят ИИБ ахборот хизмати маълум қилди.
2020 йил 16 август куни вилоятнинг Оқдарё туманида яшовчи фуқаро Х. Самарқанд шаҳри бўйича ИИО ФМБ 6-сонли ИИБга мурожаат қилиб, нотаниш фуқаро унинг пластик картасидан 2 миллион 790 минг сўм пулларини ечиб олганлигини маълум қилган.
Маълум бўлишича, 2020 йилнинг 15 апрель куни Х. Самарқанд шаҳридаги «Ипак йўли» банки филиалларидан бирига бориб, пластик карточкасини телефон аппаратига уламоқчи бўлган. Шу пайт унинг ёнига фуқаро З. келиб, пластик карточкасини телефон аппаратига улаб, пулларни бошқа пластик карточкасига ўтказиб беришда ёрдам беришини айтган.
Амалий ёрдам вақтида З. пластик карточкадаги кодларни эслаб қолиб, Х.га «пулларингизни ўтказиб бўлмади» деган ва пластик картасини қайтариб берган. Фуқаро Х. банкдан кетганидан сўнг пластик карточка кодларини ўзининг телефон аппаратига улаб, ундан 2 миллион 790 минг сўм пулни яширин равишда талон-торож қилиб, воқеа жойидан кетган.
Самарқанд вилоят ИИБ ЖҚБ Тезкор-қидирув ҳамкорлиги бўлими ҳамда Самарқанд шаҳри бўйича ИИО ФМБ 6-сонли ИИБ ходимлари томонидан ўтказилган тезкор-қидирув тадбирлари натижасида ушбу жиноятни Самарқанд шаҳри Мотрид қўрғонида яшовчи, 1985 йилда туғилган М.З. содир қилганлиги аниқланган.
Ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан Жиноят кодексининг 169-моддаси 3-қисми «а» банди (такроран ёки хавфли рецидивист томонидан ўғрилик) билан жиноят иши қўзғатилиб, тергов ҳаракатлари олиб борилмоқда.
Изоҳ (0)