Тошкент шаҳрининг кириш имтиҳонлари ўтказиладиган 4 та ҳудудидаги тайёргарлик жараёнлари — суратларда

Аввал хабар берилганидек, Ўзбекистонда ОТМларга кириш имтиҳонлари 2 сентябрдан бошланади. Уларда абитуриентларнинг ота-оналари учун алоҳида кутиш жойлари ташкил қилинмайди.

Тошкент шаҳар ҳокимлиги 25 август куни пойтахтдаги тест синовлари ўтказиладиган жойлар ва абитуриентларга яратилган шароитлар билан таништириш мақсадида оммавий ахборот воситалари вакиллари учун пресс-тур ташкил этди. Унда журналистлар Тошкент шаҳрида имтиҳон топшириладиган 4 та манзил билан танишиш имкониятига эга бўлди.

Талабалар шаҳарчаси хиёбони

Олмазор тумани ҳудудида 2 та нуқта: 76 та гуруҳда 2280 нафар абитуриентга мўлжалланган Талабалар шаҳарчаси хиёбони ва 16 та гуруҳда 480 нафар абитуриентга мўлжалланган ‘Ғалаба боғи’ ҳудудидаги ёпиқ саҳна майдони имтиҳон ўтказиш учун тайёрланган. Бугунги кунга қадар марказлашган тарзда мебель, яъни парта, стол-стул, керакли жиҳозларни тайёрлашда Учтепа ва Миробод туман ҳокимликлари билан бирга шай ҳолатга келтирилган.Ҳусниддин Мамадиев, Олмазор тумани ҳокимининг ёшлар сиёсати, ижтимоий ривожлантириш, маънавий-марифий ишлар бўйича ўринбосари

Айтиш керакки, ушбу ҳудудда 24 августдан 29 августгача Россиянинг икки олий ўқув юрти: Д.И.Менделеев номидаги Россия кимё-технология университетининг Федерал давлат бюджети олий таълим муассасаси филиалининг 398 нафар абитуриенти ва «ММФИ» Миллий тадқиқот ядро университети (МТЯУ) Тошкент филиалининг 722 нафар абитуриенти имтиҳон топшириши режалаштирилган. 29 август куни ушбу таълим муассасаларига тана ҳарорати сабаб имтиҳонга кира олмаганлар учун алоҳида тарзда ташкил этилади.

Талабалар шаҳарчаси хиёбонида 2 сентябрдан бошланадиган 14 кунлик кириш имтиҳонлари учун биоҳожатхоналар, стол-стуллар 2280 абитуриент ва 76 нафар кузатувчи учун ажратилган. Абитуриентлар алоҳида-алоҳида парта ва стулларда ўтиради. Ҳар бир 30 нафар абитуриентдан иборат гуруҳга 1 нафар кузатувчи ажратилади. Захира учун ҳам мебель жиҳозлари ҳокимлик томонидан ажратиб қўйилган. Ёмғир ёғиш эҳтимолини инобатга олган ҳолда дарахтларга соябон тарзида тортиладиган тентлар шай ҳолатга келтирилган. 2 сентябрдан бошлаб Талабалар шаҳарчасига кириб-чиқиш йўллари имтиҳон вақтида ёпилиши кўзда тутилган.

«Ғалаба боғи» ҳудудидаги ёпиқ саҳна

Олмазор туманидаги имтиҳон ўтказиладиган иккинчи нуқта, «Ғалаба боғи» ҳудудидаги ёпиқ саҳнада жами 480 нафар абитуриент 16 та гуруҳда, 16 нафар кузатувчи иштирокида тест топширади.

Ҳудудда: жами 27 та камера ўрнатилган. Улар шахсни аниқловчи камера, 360 даражали камера, трансляция қилувчи камера, йўналтирилган камераларга бўлинади.

Ботаника боғи

Ботаника боғида кириш имтиҳонларида тест топширувчи абитуриентлар учун 720 та ўрин ташкил этилган. Боғнинг йўлак қисмида 300 кишилик ўрин, саҳна томонида 420 кишилик ўрин ажратилган. Йўлак қисми очиқ бўлгани сабабли агар ёмғир ёғса, ўша кунги имтиҳонлар бошқа санага кўчирилади. 24 та гуруҳни 48 нафар кузатувчи назорат қилади. Таъкидлаш керак, кузатувчиларнинг ҳам захираси шакллантирилади. Шунингдек, икки нафар бино раҳбари фаолият кўрсатади. Ҳар бир гуруҳларга алоҳида-алоҳида камералар ўрнатилган. Боғ ҳудудининг ўзида 30 та кузатув камераси ишлайди. Абитуриентлар Боғишамол кўчаси тарафдаги марказий дарвозадан киритилади.

Дезинфекция ишлари икки сменада олиб борилади. Махсус гуруҳлар ҳар бир парта, стулларни, ўриндиқларни дезинфекция қилиб, кейинги кириш имтиҳонларининг сменасига тайёрлайди. Абитуриентларни текширувдан ўтказиш, тез тиббий ёрдам кўрсатиш учун 8 гуруҳдан иборат тиббиёт ходимларининг ишлаши кўзда тутилмоқда.

Жаҳонгир Набиев, Юнусобод тумани ҳокими ўринбосари

«Пахтакор» футбол клуби стадиони

Стадионда кириш имтиҳонлари учун стол-стулларни жойлаштириш жараёни кетмоқда. Имтиҳонлар вақтида ҳудуд 3 та: А, B, C секторларига бўлинган. Уларнинг ичида энг каттаси А сектор бўлиб, у ерда 1030 нафар, Б секторда 785 нафар, C секторда эса 630 нафар, жами 2520 нафар абитуриент тест топшириши мумкин. 84 та гуруҳда 84 нафар кузатувчи ишлайди.

Масалан, B секторнинг узунлиги 800 метр бўлиб, энига 16 метр. Биз 3 метр масофани фавқулодда ҳолатларда ёки тез тиббий ёрдам машиналари учун қолдиряпмиз.

Жамшид Абдураимов, Шайхонтоҳур тумани, Жисмоний тарбия ва спорт бўлими бошлиғи

Таъкидлаш керак, ҳудудда 95 та кузатув камераси, 8 та идентификация камераси ишлаши кўзда тутилган.

Эслатиб ўтамиз, Президент Шавкат Мирзиёев 6 август куни 2020 йилда олий таълим муассасаларига қабулни ташкил қилиш ва 2020/2021-ўқув йилига тайёргарлик кўриш масалалари юзасидан йиғилиш ўтказган эди. Унда ёпиқ бинолар эпидемиологик талабга жавоб бермаслиги, ижтимоий масофага риоя қилинган тақдирда имтиҳонлар вақти анчага чўзилиб кетишини инобатга олиб, тест синовларини Тошкент ва Нукус шаҳарлари, вилоятлар марказларидаги стадионларда ташкил этиш юзасидан топшириқ берилган.

Ўзбекистонда ОТМларга кириш имтиҳонларини 25 июлдан 20 августгача ўтказиш режалаштирилаётганди. Бироқ мамлакатда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинди ва кейинчалик карантин 15 августга қадар узайтирилди. 22 июлда АОКАда ўтган брифингда Давлат тест маркази бош бошқарма бошлиғи Барно Ражабов имтиҳон чекловлар 1 сентябргача давом этса, сентябрь ойида ўтказилиши мумкинлигини айтганди. Шунингдек, Олий ва ўрта-махсус таълим вазирлиги 2020/2021-ўқув йили қабули учун магистратурага ҳужжат топширган ва муайян сабабларга кўра аризаси қабул қилинмаган абитуриентларга муаммони бартараф қилиш учун 4 августдан 6 август соат 11:00 гача вақт берган.

Аввал Давлат тест маркази Ўзбекистонда пандемия шароити мураккаб кечаётганлиги, карантин чекловлари бекор қилинмаётганлиги ёки юмшатилмаганлиги боис олий таълим муассасаларининг бакалавриат таълим йўналишларига кириш тест синовларини ўтказиш муддатлари тест топширувчилар саломатлигига зарар етмайдиган вазият келгунга қадар кейинга сурилиши ва бу ҳақда жамоатчилик мунтазам хабардор қилиб борилишини билдирганди.