AOKAda 22-iyul kuni 2020/2021 o‘quv yili uchun oliy ta’lim muassasalarining bakalavriat ta’lim yo‘nalishlariga abituriyentlarni onlayn ro‘yxatga olish yakunlari, tahlil va xulosalariga bag‘ishlangan matbuot anjumani o‘tkazildi.

“Daryo” muxbirining xabar berishicha, tadbirda Davlat test markazi bosh boshqarma boshlig‘i Barno Rajabov ayni kunlarda ko‘pchilikni qiziqtirgan masala — test sinovlari qachon o‘tkazilishi haqidagi savolga javob berdi.

“Barchamizga ma’lumki, 1-avgustgacha karantin cheklovlari belgilangan. Shu sababli test sinovlarini keyingi muddatlarga, ya’ni karantindan keyin o‘tkazish bo‘yicha takliflar berganmiz. Agar karantin cheklovlari 15-avgustgacha uzaytirilsa, imtihon 15-avgustdan keyin, cheklovlar 1-sentabrgacha davom etsa, sentabr oyida o‘tkaziladi. Bu haqda maxsus komissiya qarori chiqmagunicha aniq bir narsa deya olmaymiz”, — dedi u.

Rajabovning qayd etishicha, imtihonlar o‘tkaziladigan joylar hali tasdiqlanmagan. Avvalroq so‘nggi yillarda asosiy imtihon olish joylaridan biri bo‘lib kelgan “O‘zekspomarkaz” ko‘rgazmalar markazi koronavirusga chalingan bemorlarni qabul qilish uchun moslashtirilgan edi. “Tasdiqlangandan keyin ma’lum qilamiz. Statsionarga aylantirilgan pavilyonlarda imtihon o‘tkazilmaydi”, — deya qo‘shimcha qildi DTM vakili.