Ўзбекистонда тиббий олий таълим муассасаларини тугатган шахсларга дорихона очишларига рухсат берилди. Бу ҳақда 25 август, сешанба куни АОКАда бўлиб ўтган матбуот анжуманида Адлия вазирлиги бошқарма бошлиғи ўринбосари Жавоҳир Қуллизода маълум қилди.
Анжуманда Президент Шавкат Мирзиёевнинг «Лицензиялаш ва рухсат бериш тартиб-таомилларини тубдан такомиллаштириш чора-тадбирлари тўғрисида»ги фармони мазмун-моҳияти ва ижроси юзасидан тушунтириш берилди.
Жавоҳир Қуллизоданинг айтишича, бугунги кунда фақат олий фармацевт маълумотига эга бўлган мутахассисларгагина дорихона мудири сифатида ишлашига рухсат этилган эди.
«Эндиликда қонунчиликка ўзгартириш киритиш бўйича топшириқлар берилди. Олий тиббий маълумотга эга бўлган мутахассислар ҳам дорихона мудири сифатида ишлашлари мумкин. Бу тиббий олий таълим муассасаларини тугатган шахслар дорихона очишлари мумкин дегани», — деди мутахассис.
Фармонга мувофиқ, 2021 йил 1 январдан бошлаб:
- 37 та лицензия ва 10 та рухсатнома бекор қилинади;
- 16 та лицензия ва 11 та рухсатнома бирлаштириш йўли билан бекор қилинади;
- 17 та лицензия ва 14 та рухсатнома хабардор қилиш тартиби жорий этилиши йўли билан бекор қилинади;
- 14 та турдаги лицензия ва рухсатномани расмийлаштириш муддатлари қарийб 2 бараварга қисқартирилади;
- 115 та лицензия ва рухсат бериш хусусиятига эга ҳужжатни олиш тартиб-таомиллари янада соддалаштирилади.
Изоҳ (0)