Коронавирусга қарши кураш штаби аъзоси экспресс тест таҳлили ва у кимларда ўтказилиши ҳақида маълумот берди

25 август, сешанба куни АОКАда бўлиб ўтган брифингда Коронавирусга қарши кураш штаби аъзоси, эпидемиолог Рустам Икромов экспресс тест таҳлили ва у кимларда ўтказилиши ҳақида маълумот берди.

Мутахассиснинг таъкидлашича, иммуноглобулин М ва G синфига кирувчи антитаналар тезкор тестлар, яъни, сезгирлиги 85 фоиздан, спецификлиги эса 95 фоиздан кам бўлмаган очиқ ва ёпиқ типдаги иммунофермент таҳлили тўпламлари билан аниқланади.

Бунда: М синфига кирувчи антитаналар ёки COVID-19’га қарши йиғинди антитаналар ижобий бўлган барча беморлар тўғрисида шошилинч хабар Санитария-эпидемиологик осойишталик марказига берилади ва улар қўшимча равишда COVID-19’га ПЦР таҳлилида текширилади.

ПЦР таҳлилининг жавоби маълум бўлгунча текширилган шахслар уй карантинида бўлишади.

ПЦР таҳлили манфий, лекин G синфига кирувчи антитаналар ёки COVID-19’га қарши йиғинди антитаналар текшириш натижаси ижобий бўлган шахсларда иммунитет пайдо бўлган ва COVID-19’дан ҳимояланган деб ҳисобланади.

ПЦР таҳлили жавоби ижобий бўлганда текширилувчи коронавирус инфекцияси билан касалланган деб ҳисобланади ва касаллик кечиши даражасига қараб даволанишга юборилади.

Рустам Икромов, Коронавирусга қарши кураш штаби аъзоси, эпидемиолог